தவறவிடாதீர்கள்..!உடனே பதிவு செய்யுங்கள்

(நெவில் அன்தனி)

லங்கா பிரீமியர் லீக்கின் 6ஆவது அத்தியாயத்திற்கான 'வெளிநாட்டு வீரர்கள் பதிவு' இணையதளம் 2026 மே 8ஆம் திகதி திறக்கப்படும் என ஸ்ரீலங்கா கிரிக்கெட் (LPL) செவ்வாய்க்கிழமை (05) அறிவித்தது.

இந்த இணையத்தளம் தொடங்கியவுடன் www.srilankacricket.lk என்ற முகவரியை வெளிநாட்டு வீரர்களுக்கு அணுகக் கூடியதாக இருக்கும் எனவும் இந்த இணையத்தளம் மே 18ஆம் திகதிவரை இயங்கும் எனவும் ஸ்ரீலங்கா கிரிக்கெட் தெரிவித்தது.

மிகுந்த எதிர்பார்ப்புகளுக்கு மத்தியில் ஆறாவது ரி20 லீக் அத்தியாயம் கொழும்பு  எஸ் எஸ் சி மைதானம், ஆர். பிரேமதாச சர்வதேச கிரிக்கெட் விளையாட்டரங்கு, பல்லேகலை சர்வதேச கிரிக்கெட் விளையாட்டரங்கு, ரங்கிரி தம்புள்ளை சர்வதேச கிரிக்கெட் விளையாட்டரங்கு ஆகிய நான்கு மைதானங்களில் நடைபெறவுள்ளது.

லங்கா பிரீமியர் லீக் 2026 சுற்றுப் போட்டியை ஜூலை மற்றும் ஆகஸ்ட் மாதங்களில் நடத்த திட்டமிடப்பட்டுள்ளது. 

போட்டி நிகழ்வுக்கான உரிமத்தை வைத்திருக்கும் ஐபிஜி குழுமத்துடன் இணைந்து லங்கா பிறீமியர் லீக் போட்டியை  எல் பி எல் உரிமையாளரான ஸ்ரீலங்கா கிரிக்கெட் நிறுவனம் நடத்தும்.

இரண்டு வருடங்களுக்கு முன்னர் ஐந்தாவது எல்பிஎல் அத்தியாயத்தின் இறுதிப் போட்டியில் கோல் மார்வல்ஸை 9 விக்கெட்களால் வெற்றிகொண்டு ஜெவ்னா கிங்ஸ் சம்பியனாகி இருந்தது.