தவறவிடாதீர்கள்..!உடனே பதிவு செய்யுங்கள்

(இணையத்தள செய்திப் பிரிவு)

இந்திய வம்சாவளி தமிழர்களுக்கான வீடமைப்பு திட்டத்தின் முன்னேற்றங்களை பார்வையிடும் நோக்கில், இன்று திங்கட்கிழமை (20) நுவரெலியாவுக்கு இந்திய துணை ஜனாதிபதி சி.பி. இராதாகிருஷ்ணன் விஜயம் மேற்கொண்டுள்ளார்.

அங்கு இந்திய துணை ஜனாதிபதி சி.பி. இராதாகிருஷ்ணனை பெருந்தோட்ட மற்றும் சமூக உட்கட்டமைப்பு வசதிகள் பிரதி அமைச்சர் சுந்தரலிங்கம் பிரதீப் வரவேற்றார்.

இந்த விஜயத்தின் போது, இந்திய அரசாங்கத்தின் ஆதரவுடன் செயல்படுத்தப்படும் வீடமைப்பு திட்டத்தின் கீழ் கட்டப்பட்டு வரும் வீடுகள் மற்றும் தொடர்புடைய உட்கட்டமைப்பு வசதிகள் குறித்து நேரடியாக ஆய்வு மேற்கொள்ளப்படவுள்ளது. குறிப்பாக, இலங்கையின் மலையகப் பகுதிகளில் வாழும் இந்திய வம்சாவளி தமிழர்களின் வாழ்க்கைத் தரத்தை உயர்த்தும் நோக்கில் இந்தத் திட்டம் முக்கிய பங்கு வகிக்கிறது.

இத்திட்டம், குடியிருப்பு வசதிகளை மேம்படுத்துவதோடு மட்டுமல்லாமல், சமூக மற்றும் பொருளாதார முன்னேற்றத்திற்கும் அடித்தளமாக அமைகிறது. இந்தியா–இலங்கை உறவுகளை மேலும் வலுப்படுத்தும் முக்கிய முயற்சியாகவும் இது கருதப்படுகிறது.

இந்த விஜயம், இந்திய வம்சாவளி தமிழர்களின் வாழ்வாதாரத்தை மேம்படுத்துவதில் இந்தியாவின் தொடர்ச்சியான அர்ப்பணிப்பை வெளிப்படுத்துவதாகவும் அமைகின்றது.