தவறவிடாதீர்கள்..!உடனே பதிவு செய்யுங்கள்

(இணையத்தள சர்வதேச செய்தி பிரிவு)

சீனாவுக்கு உத்தியோகபூர்வ விஜயம் மேற்கொண்டுள்ள ஐக்கிய அரபு அமீரகத்தின் அபுதாபி இளவரசர் ஷேக் காலித் பின் முகமது பின் சையத் அல் நஹ்யானை, சீன ஜனாதிபதி ஷி ஜின்பிங் பெய்ஜிங்கில் உள்ள மக்கள் மாமன்றத்தில் சந்தித்துப் பேசினார்.

இந்தச் சந்திப்பின் போது, மத்திய கிழக்கு மற்றும் வளைகுடா பிராந்தியத்தில் நிலவும் பதற்றமான சூழல் குறித்து இரு தலைவர்களும் விரிவாக ஆலோசனை நடத்தினர். அப்போது, பிராந்திய அமைதிக்காக சீனா பின்பற்றும் "நான்கு முக்கியக் கொள்கைகளை" ஜனாதிபதி ஷி ஜின்பிங் விளக்கினார்.

அமைதியான சகவாழ்வு 

வளைகுடா நாடுகள் பிரிக்க முடியாத அண்டை நாடுகள். அவற்றுக்கிடையேயான உறவை மேம்படுத்துவதன் மூலம் மட்டுமே நிலையான பாதுகாப்பு கட்டமைப்பை உருவாக்க முடியும்.

தேசிய இறையாண்மைக்கு மதிப்பளித்தல் 

ஒவ்வொரு நாட்டின் இறையாண்மையும், பாதுகாப்பும் பாதுகாக்கப்பட வேண்டும். மற்ற நாடுகளின் உள்விவகாரங்களில் தலையிடாமல், வளைகுடா நாடுகளின் எல்லை ஒருமைப்பாட்டை மதிக்க வேண்டும்.

சர்வதேச சட்டத்தின் ஆட்சி 

சர்வதேச விதிகளை தங்களுக்குத் தேவையானபடி வளைப்பதைத் தவிர்க்க வேண்டும். ஐக்கிய நாடுகள் சபையின் சாசனத்தைப் பின்பற்றி, "காட்டுச் சட்டத்திற்கு" (Law of the jungle) உலகம் திரும்புவதைத் தடுக்க வேண்டும்.

மேம்பாடு மற்றும் பாதுகாப்பில் சமநிலை 

பாதுகாப்பு இருந்தால் மட்டுமே வளர்ச்சி சாத்தியம்; வளர்ச்சி இருந்தால் மட்டுமே பாதுகாப்பு உறுதிப்படும். எனவே, வளைகுடா நாடுகளின் பொருளாதார மேம்பாட்டிற்குச் சீனா தனது நவீனமயமாக்கல் திட்டங்கள் மூலம் ஒத்துழைக்கத் தயாராக உள்ளது.

சீனாவின் ஆக்கபூர்வமான பங்கு

மத்திய கிழக்கில் அமைதியை நிலைநாட்டவும், பேச்சுவார்த்தைகளை முன்னெடுக்கவும் சீனா தொடர்ந்து ஆக்கபூர்வமான பங்களிப்பை வழங்கும் என்று அதிபர் ஷி ஜின்பிங் மீண்டும் உறுதிபடத் தெரிவித்தார். பிராந்தியத்தில் போர் மேகங்கள் சூழ்ந்துள்ள நிலையில், சீனாவின் இந்த நான்கு அம்சத் திட்டம் சர்வதேச அளவில் உன்னிப்பாகக் கவனிக்கப்படுகிறது.