தவறவிடாதீர்கள்..!உடனே பதிவு செய்யுங்கள்

நேற்றைய தினம் எரிசக்தி அமைச்சர் மற்றும் அமைச்சின் செயலாளர் ஆகியோர் தமது பதவிகளில் இருந்து விலகியமை, எதிர்க்கட்சியின் ஒரு மாபெரும் வெற்றியாகவே பார்க்கப்பட வேண்டும் என ஸ்ரீ லங்கா சுதந்திரக் கட்சியின் பொருளாளர் லசந்த அழகியவன்ன தெரிவித்தார்.

இன்றைய தினம் சனிக்கிழமை (18) ஸ்ரீலங்கா சுதந்திர கட்சியின் தலைமையகத்தில் நடைபெற்ற ஊடகவியலாளர் சந்திப்பில் கலந்துகொண்டு கருத்து தெரிவிக்கும் போதே அவர் இவ்வாறு தெரிவித்தார். 

சமூக ஊடகங்கள் ஊடாக முன்னெடுக்கப்பட்ட விழிப்புணர்வு மற்றும் பொதுமக்களின் பலத்த அழுத்தம் காரணமாகவே இந்த பதவி விலகல் இடம்பெற்றுள்ள போதிலும், அரசாங்கம் இதனை ஒரு சுயாதீன விசாரணைக்கான நடவடிக்கை எனக்கூறி நியாயப்படுத்த முயல்வதாக அவர் சுட்டிக்காட்டினார்.

முன்னதாக நம்பிக்கையில்லாப் பிரேரணையின் போது அரசாங்கத்தின் 159 பாராளுமன்ற உறுப்பினர்களும் எவ்வித தவறும் நடக்கவில்லை எனக் கூறி அரசாங்கத்தை பாதுகாத்த போதிலும், பாராளுமன்றத்தில் நிரூபிக்க முடியாத உண்மைகள் தற்போது மக்கள் முன்னிலையில் நிரூபணமாகியுள்ளதாக அவர் குறிப்பிட்டார்.

பொது நிறுவனங்கள் தொடர்பான குழுவின் (COPE) செயற்பாடுகள் குறித்து கருத்து தெரிவித்த அவர், கோப் குழுவின் தலைவர் ஒரு குறிப்பிட்ட அரசியல் கட்சியை பிரதிநிதித்துவப்படுத்த முடியாது எனவும், ஒரு நாள் விசாரணையை மட்டும் வைத்துக்கொண்டு இறுதி முடிவுக்கு வர முடியாது எனவும் தெரிவித்தார்.

தணிக்கையாளர் நாயகத்தின் அறிக்கை என்பது குற்றவாளிகளை தீர்மானிக்கும் ஆவணம் அல்ல என்றும், அது பரிந்துரைகளை மட்டுமே வழங்கும் என்றும் குறிப்பிட்ட அவர், அந்த அறிக்கை பாராளுமன்றத்தில் சமர்ப்பிக்கப்பட்டு பெரும்பான்மை வாக்குகளுடன் நிறைவேற்றப்பட்ட பின்னரே சட்ட நடவடிக்கைக்காக சட்டமா அதிபரிடமோ அல்லது குற்றப்புலனாய்வு திணைக்களத்திடமோ ஒப்படைக்கப்படும் என விளக்கமளித்தார். 

பாராளுமன்றமோ அல்லது தணிக்கை அலுவலகமோ தண்டனை வழங்கும் நிறுவனங்கள் அல்ல என்பதால், குற்றம் நிரூபிக்கப்படும் வரை எவரும் குற்றவாளிகள் அல்ல என அரசாங்கம் கூறுவது தட்டிக்கழிக்கும் செயல் என அவர் விமர்சித்தார்.

நிலக்கரி கொள்வனவு தொடர்பான முறைகேடுகள் பற்றி பேசுகையில், கொள்வனவு நடைமுறையில் பாரிய சிக்கல்கள் காணப்படுவதாக அவர் சுட்டிக்காட்டினார். 

குறிப்பாக, 5000 டொலர் பதிவுக்கட்டணம் செலுத்த வேண்டிய இடத்தில் 10 டொலர் குறைவாக செலுத்தப்பட்டுள்ளமை உள்ளிட்ட விடயங்கள் தணிக்கை அறிக்கையில் சுட்டிக்காட்டப்பட்டுள்ளன.

அரசாங்கம் ஆட்சிக்கு வரும் போது ஊழல்களுக்கு தண்டனை வழங்குவதாக உறுதியளித்த போதிலும், கடந்த இரண்டு வருடங்களாக பழைய ஊழல்கள் குறித்து நடவடிக்கை எடுக்காமல், தற்போது இவர்களது முதலாவது நிலக்கரி டெண்டர் சர்ச்சைக்குள்ளானதும் 2009 ஆம் ஆண்டு முதல் விசாரணைகளை நடத்த வேண்டும் என கூறுவது முறையற்றது என அவர் தெரிவித்தார்.

இதேவேளை, நாமல் ராஜபக்ச எதிர்க்கட்சியின் தலைமைத்துவத்தை ஏற்கத் தயாராக இருப்பது குறித்த கேள்விக்கு பதிலளித்த லசந்த அழகியவன்ன, தாம் தலைமைத்துவத்திற்கு தகுதியானவர் என்று கூறுவதற்கு நாமல் ராஜபக்சவுக்கும் அல்லது எதிர்க்கட்சியில் உள்ள எவருக்கும் உரிமை உண்டு எனத் தெரிவித்தார்.

அனைவரும் தங்களைத் தலைவர்கள் என நினைத்துச் செயற்படுவதில் தவறில்லை எனக் குறிப்பிட்ட அவர், ஸ்ரீ லங்கா சுதந்திரக் கட்சிக்கு என ஒரு தனித்துவமான அடையாளம் உள்ளதாகவும், இறுதியில் தேர்தலொன்று இடம்பெறும் போது யார் தலைமைத்துவத்திற்கு தகுதியானவர் என்பதை மக்களே தீர்மானிப்பார்கள் என்றும் தனது உரையில் வலியுறுத்தினார்.