தவறவிடாதீர்கள்..!உடனே பதிவு செய்யுங்கள்

(நெவில் அன்தனி)

ஐக்கிய அரபு இராச்சியத்துக்கு எதிராக சென்னை சேப்பாக்கம் எம்.எஸ். சிதம்பரம் விளையாட்டரங்கில் செவ்வாய்க்கிழமை (10) நடைபெற்ற ஐசிசி ஆடவர் ரி20 உலகக் கிண்ண டி குழு போட்டியில் டிம் சீபேர்ட் - பின் அலன் ஆகியோர் ரி20 உலகக் கிண்ணத்துக்கான இணைப்பாட்ட சாதனையை நிலைநாட்ட ஐக்கிய அரபு இராச்சியத்தை 10 விக்கெட்களால் நியூஸிலாந்து இலகுவாக வெற்றிகொண்டது.

அப் போட்டியில் ஐக்கிய அரபு இராச்சியத்தினால் நிர்ணயிக்கப்பட்ட 174 ஓட்டங்கள் என்ற வெற்றி இலக்கை நோக்கி பதிலுக்கு துடுப்பெடுத்தாடிய நியூஸிலாந்து சார்பாக டிம் சீபேர்ட், பின் அலென் ஆகிய இருவரும் 15.2 ஓவர்களில் சாதனைமிகு 175 ஓட்டங்களைப் பகிர்ந்து தமது அணிக்கு இலகுவான வெற்றியை ஈட்டிக்கொடுத்தனர்.

இந்த இணைப்பாட்டமானது ரி20 உலகக் கிண்ண கிரிக்கெட் வரலாற்றில் சகல விக்கெட்களுக்குமான சாதனையாகும்.

இதன் மூலம் நான்கு வருடங்களுக்கு முன்னர் அடிலெய்டில் நடைபெற்ற இந்தியாவுக்கு எதிரான ரி20 உலகக் கிண்ணப் போட்டியில் இங்கிலாந்தின் அலெக்ஸ் ஹேல்ஸ், ஜொஸ் பட்லர் ஆகிய இருவரும் ஆரம்ப விக்கெட்டில் பகிர்ந்த 170 ஓட்ட இணைப்பாட்ட சாதனை முறியடிக்கப்பட்டது.

டிம் சீபேர்ட் 42 பந்துகளில் 12 பவுண்டறிகள், 3 சிக்ஸ்கள் உட்பட 89 ஓட்டங்களுடனும் பின் அலன் 50 பந்துகளில் 5 பவுண்டறிகள், 5 சிக்ஸ்கள் உட்பட 84 ஓட்டங்களுடனும் ஆட்டம் இழக்காதிருந்தனர்.

இப் போட்டியில் முதலில் துடுப்பெடுத்தாடிய ஐக்கிய அரபு இராச்சியம் 20 ஓவர்களில் 6 விக்கெட்களை இழந்து 173 ஓட்டங்களைப் பெற்றது.

ஆரம்ப வீரர் ஆரியன்ஷ் ஷர்மா (8) குறைந்த ஓட்டங்களுக்கு ஆட்டம் இழந்தபோதிலும் அணித் தலைவர் முஹம்மத் வசீம், அலிஷான் ஷராபு ஆகிய இருவரும் இரண்டாவது விக்கெட்டில் 107 ஓட்டங்களைப் பகிர்ந்து அணியை சிறப்பான நிலையில் இட்டனர்.

முஹம்மத் வசீம் 45 பந்துகளில் 4 பவுண்டறிகள், 3 சிக்ஸ்களுடன் 66 ஓட்டங்களையும் அலிஷான் ஷராபு 47 பந்துகளில் 5 பவுண்டறிகள், 2 சிக்ஸ்களுடன் 55 ஓட்டங்களையும் பெற்றனர்.

அவர்களை விட மயான்க் குமார் 21 ஓட்டங்களைப் பெற்றார்.

பந்துவீச்சில் மெட் ஹென்றி 37 ஓட்டங்களுக்கு 2 விக்கெட்களைக் கைப்பற்றினார்.

ஆட்டநாயகன்: டிம் சீபேர்ட்