தவறவிடாதீர்கள்..!உடனே பதிவு செய்யுங்கள்

கொஹுவலை, சரணங்கர வீதி, போதியவத்தை பகுதியில் 2025.12.30 அன்று இரவு இடம்பெற்ற துப்பாக்கிச் சூட்டு சம்பவத்துடன் தொடர்புடைய துப்பாக்கிதாரி மேல்மாகாணத்தின் தெற்கு பொலிஸ் குற்றத் தடுப்பு பிரிவினரால் வெள்ளிக்கிழமை (23) கைதுசெய்யப்பட்டுள்ளார்.

கைதுசெய்யப்பட்டவர் தெஹிவளை பகுதியைச் சேர்ந்த 35 வயதுடையவர் ஆவார்.

இது தொடர்பில் தெரியவருவதாவது, 

கொஹுவலை, சரணங்கர வீதி, போதியவத்தை பகுதிக்கு 2025.12.30 அன்று இரவு மோட்டார் சைக்கிளில் சென்ற இனந்தெரியாத இருவர்  வீடொன்றின் மீது துப்பாக்கிச் சூடு நடத்திவிட்டு தப்பிச் சென்றுள்ளனர். 

துப்பாக்கிச் சூட்டில் 16 வயதுடைய சிறுமி ஒருவர் காயமடைந்து களுபோவில போதனா வைத்தியசாலையில் அனுமதிக்கப்பட்டார். 

இதனையடுத்து பொலிஸாரால் மேற்கொள்ளப்பட்ட விசாரணையில், துப்பாக்கிச் சூட்டுக்கு இலக்கு வைக்கப்பட்டவர் சிறுமி அல்ல சிறுமியின் தாய் என தெரியவந்துள்ளது.

இது தொடர்பில்  பொலிஸாரால் மேற்கொள்ளப்பட்ட மேலதிக விசாரணையில், இந்த துப்பாக்கிச் சூட்டு சம்பவத்துடன் தொடர்புடைய துப்பாக்கிதாரி தெஹிவளையில் கைதுசெய்யப்பட்டுள்ளார்.

கைதுசெய்யப்பட்ட துப்பாக்கிதாரி இராணுவத்திலிருந்து தப்பிச் சென்றவர் என பொலிஸ் விசாரணையில் தெரியவந்துள்ளது.

துப்பாக்கிதாரியிடம் நடத்தப்பட்ட விசாரணையில், தெஹிவளை பகுதியில் உள்ள பழைய வீடொன்றில் இருந்து துப்பாக்கிச் சூட்டுச் சம்பவத்துக்கு பயன்படுத்தப்பட்ட துப்பாக்கி கைப்பற்றப்பட்டுள்ளது.

இந்த துப்பாக்கிச் சூடு பாதாள உலக கும்பல் தலைவரின் தலைமையில் இடம்பெற்றுள்ளதாக பொலிஸ் விசாரணையில் தெரியவந்துள்ளது.

இது தொடர்பான மேலதிக விசாரணைகளை மேல்மாகாணத்தின் தெற்கு பொலிஸ் குற்றத் தடுப்பு பிரிவினர் மேற்கொண்டு வருகின்றனர்.