தவறவிடாதீர்கள்..!உடனே பதிவு செய்யுங்கள்

(நெவில் அன்தனி)

இங்கிலாந்துக்கு எதிராக வியாழக்கிழமை (22) ஆரம்பமாகவுள்ள 3 போட்டிகள் கொண்ட சர்வதேச ஒருநாள் கிரிக்கெட் தொடரை முன்னிட்டு சரித் அசலன்க தலைமையிலான 17 வீரர்களைக் கொண்ட இலங்கை குழாத்தை ஸ்ரீலங்கா கிரிக்கெட் உத்தியோகபூர்வமாக இன்று வெளியிட்டது.

பாகிஸ்தானுக்கு எதிராக கடந்த வருடம் தோல்வியில் முடிவடைந்த சர்வதேச ஒருநாள் கிரிக்கெட் தொடரில் இலங்கை அணியில் இடம்பெற்ற ஒருவரைத் தவிர ஏனையவர்கள் அனைவரும் இங்கிலாந்துக்கு எதிரான தொடருக்கான இலங்கை குழாத்தில் இடம்பெறுகின்றனர்.

அதேவேளை, இரண்டு வருட இடைவெளிக்குப் பின்னர் தனஞ்சய டி சில்வாவும் பாகிஸ்தானுக்கு எதிரான தொடரில் இடம்பெறாமலிருந்த சுழல்பந்துவீச்சாளர் துனித் வெல்லாலகேவும் குழாத்தில் மீண்டும் இணைத்துக்கொள்ளப்பட்டுள்ளனர்.

பாகிஸ்தானுக்கு எதிரான தொடரில் இடம்பெற்ற வேகப்பந்துவீச்சாளர் துஷ்மன்த சமீரவுக்கு பதிலாக இங்கிலாந்துக்கு எதிரான தொடருக்கு வேகப்பந்துவீச்சு சகலதுறை வீரர் மிலன் ரத்நாயக்க இணைத்துக்கொள்ளப்பட்டுள்ளார்.

பங்களாதேஷுக்கு எதிராக கடந்த ஜுலை மாதம் நடைபெற்ற முதலாவது சர்வதேச ஒருநாள் கிரிக்கெட் தொடரில் அறிமுகமான மிலன் ரத்நாயக்க அதன் பின்னர் சர்வதேச ஒருநாள் கிரிக்கெட் போட்டிகளில் விளையாடவில்லை.

இலங்கை ஒருநாள் கிரிக்கெட் குழாம்

சரித் அசலன்க (தலைவர்), பெத்தும் நிஸ்ஸன்க, காமில் மிஷார, குசல் மெண்டிஸ், சதீர சமரவிக்ரம, பவன் ரத்நாயக்க, தனஞ்சய டி சில்வா, ஜனித் லியனகே, கமிந்து மெண்டிஸ், துனித் வெல்லாலகே, வனிந்து ஹசரங்க, ஜெவ்றி வெண்டசே, மஹீஷ் தீக்ஷன, மிலன் ரத்நாயக்க, அசித்த பெர்னாண்டோ, ப்ரமோத் மதுஷான், ஏஷான் மாலிங்க