தவறவிடாதீர்கள்..!உடனே பதிவு செய்யுங்கள்

அனர்த்தங்கள் உடைமைகள், அன்றாட வாழ்வியல் , நடைமுறைகள் என்பவற்றினை மட்டுமல்ல பாதிக்கப்பட்ட சமூகங்களின் உளவியலிலும் பாதிப்பினை ஏற்படுத்தி விடுகின்றன.

அதிலும் குறிப்பாக சிறுவர்கள் இவ்வாறான அனர்த்தங்களினால் எதிர்கொள்கின்ற சிக்கல்கள் கவனத்திற்கொள்ளப்பட வேண்டியதொன்று. அந்த வகையில் கடந்த மாதம் இலங்கை மக்களை உலுக்கிய டித்துவா புயலின் பாதிப்பும் அதனால் தம் உறவுகள், உடைமைகளை இழந்து நிற்கின்றவர்களது பாதிப்பும் குறிப்பிடத்தக்கது.

இவ்வாறான பாதிப்புகளுக்கு முகங்கொடுத்துள்ள சிறுவர்களது உள ஆற்றுகைக்கான நிகழ்வுகளை முன்னெடுக்கின்ற அமைப்புக்களுள் வண்ணாத்திப்பூச்சி சமாதான பூங்காவும் (Butterfly Peace Garden) ஒன்று. கடந்த முப்பது வருடங்களாக இவர்கள் பல்வேறுப்பட்ட நல்லிணக்கம் சார் நிகழ்வுகள், மதத்தலைவர்களின் ஒன்றிணைப்புக்கள், யுத்தத்தினால் பாதிக்கப்பட்டவர்களுக்கான உள ஆற்றுப்படுத்தல்கள், சுனாமியினால் பாதிப்படைந்தவர்களுக்கான உள ஆற்றுப்படுத்தல்கள் என்பவற்றினை முன்னெடுத்து வந்துள்ளனர். ஆந்த வகையில் தற்போது இவர்களது பயணம் மலையக மக்களை நோக்கி ஆரம்பிக்கப்பட்டுள்ளது.

இதன் முதற்கட்டமாக நேற்று சனிக்கிழமை (27)  மாவனெலல்ல நோக்கிய மனிதநேய பயணத்தினை மட்டக்களப்பிலிருந்து ஆரம்பித்துள்ளனர். நேற்றைய தினம் இவர்களினால் மாவனெல்ல நாவந்தல கிராமத்திலுள்ள புத்தவிகாரையில் தங்கியுள்ள 36 குடும்பங்களைச் சேர்ந்த 45 சிறார்களுக்கும் 40 வயதுவந்தவர்களுக்குமான உள சமூக ஆற்றுப்படுத்தல் நிகழ்வு முன்னெடுக்கப்பட்டது.

இந்நிகழ்வில் சிறுவர்களுக்கான கைப்பணி வேலைகள், பாடல்கள், நாடகங்கள் ஊடாக ஆற்றுப்படுத்தல் செயற்பாடுகள் இடம்பெற்றன.

இதன் தொடர்ச்சியாக இன்றைய தினம் இவர்கள் ஏனைய இடைத்தங்கல் முகாம்களுக்கு பயணிக்கவுள்ளதுடன் தொடர்ச்சியாக தமது ஆற்றுப்படுத்தல் நிகழ்வுகளை முன்னெடுப்பதற்கான பயணத்தினை மேற்கொள்ளவுள்ளனர்.