இன்றைய திகதியில் கல்லூரியில் படிக்கும் பெண்களாகயிருந்தாலும் சரி அல்லது பெசன் ஷோக்களில் பங்குபற்றும் யுவதிகளாகயிருந்தாலும் சரி ஹைஹீல்ஸ் எனப்படும் குதி கால் உயர காலணியை விரும்பி அணிகிறார்கள். இவர்கள் நாளடைவில் குதி கால் வலிக்கும் ஆளாகிறார்கள்.

அதிகநேரம் நின்றுக்கொண்டே பணியாற்றுவது,கரடுமுரடான பாதைகளில் நடப்பது, குளிரில் அல்லது தண்ணீரில் நடப்பது, அதிக எடையை தூக்குவது, முறையான பயிற்சியில்லாமல் திடீரென்று அதிகளவில் உடற்பயிற்சி செய்வது, வாதப்பாதிப்பை ஏற்படுத்தும் உணவுகளை வகைப்படுத்தமால் சாப்பிடுவது, பாரம்பரிய குறைபாடு போன்ற பல காரணங்களால் குதிகால் வலி ஏற்படுகிறது. இந்த வலி முப்பதிலிருந்து நாற்பத்தைந்து வயது வரையுள்ளவர்களில் பெண்களையே அதிகம் தாக்குகிறது என்று ஆய்வின் மூலம் கண்டறியப்பட்டிருக்கிறது.

ஒரு சிலர் காலையில் எழுந்ததும் கால்களை தரையில் வைக்க முடியாத அளவிற்கு வலியால் துடிப்பார்கள். 3 மணித்தியாலம் அல்லது 4 மணித்தியாலம் சென்ற பிறகு வலி மறைந்து, கால்கள் இயல்பாகிவிடும். இத்தகைய பாதிப்பு ஏற்பட்டால் உடனடியான மருத்துவர்களை அதிலும் குறிப்பாக எலும்பு மருத்துவர்களை சந்தித்து ஆலோசனைப் பெற்றுக் கொள்ளவேண்டும்.

அவர்கள் முறைப்படி சில பரிசோதனைகளை செய்து பாதிப்பின் தன்மை மற்றும் வீரியத்தை கண்டறிந்து அதற்குரிய சிகிச்சைகளை மேற்கொள்ளவேண்டும் என்று பரிந்துரைப்பர். பிஸியோதெரபி எனப்படும் இயன்முறை மருத்துவம் இதற்கு சரியான நிவாரணத்தை அளித்து வருகிறது. வலி குறையவில்லை என்றால் பாதிப்பின் தன்மையை மீண்டும் ஒரு முறை சோதித்து ஒலி அலை சிகிச்சையும் லேசர் சிகிச்சையும் மேற்கொள்வார்கள். இவ்விரண்டு சிகிச்சைகளிலும் முழுமையான பலன் பெறமுடியதாவர்களுக்கு மட்டுமே சத்திர சிகிச்சை செய்து கொள்ள பரிந்துரைக்கப்படுகிறார்கள்.

இதனை தடுக்கவேண்டும் என்றால், முறையான திட்டமிட்ட உடற்பயிற்சி செய்து உடல் எடையை கட்டுக்குள் வைத்திருக்கவேண்டும். காலணியில்லாமல் நடக்கக்கூடாது. மருத்துவர்களின் ஆலோசனைப் பெற்று உடல் ஆரோக்கியத்தை பாதிக்காத அளவிற்குரிய காலணிகள் ஓர்டர் செய்து அணியலாம். குறிப்பாக புகைபிடிக்ககூடாது. அதை அலட்சியப்படுத்தி புகைப்பிடித்தால் இரத்த குழாய்களில் சுருக்கம் ஏற்பட்டு இரத்தவோட்டம் தடைபடும். அதனால் குதிகாலுக்கு இரத்த ஓட்டம் குறைந்து வலி உருவாகும்.

வைத்தியர். ராஜ்கண்ணா

தொகுப்பு அனுஷா.

தகவல் : சென்னை அலுவலகம்