தவறவிடாதீர்கள்..!உடனே பதிவு செய்யுங்கள்

கண்டி - உடதும்பர பகுதியில் 200 மில்லிமீற்றருக்கும் அதிகளவு மழை பெய்துவருவதாக தேசிய கட்டிட ஆராய்ச்சி நிறுவனம் தெரிவித்துள்ளது.

அத்துடன் உடதும்பர பகுதிக்கு மண்சரிவு அபாய எச்சரிக்கை விடுக்கப்பட்டுள்ளதாகவும், இதனால் அப்பகுதியில் வசிக்கும் மக்கள் தேவையற்ற பயணங்களையும் அபாயகரமான இடங்களுக்குச் செல்வதையும் தவிர்க்குமாறு தேசிய கட்டிட ஆராய்ச்சி நிறுவனம் கேட்டுக்கொண்டுள்ளது.

மழை நிலைமை காரணமாக கண்டி மற்றும் நுவரெலியா மாவட்டங்களில் உள்ள 8 பிரதேச செயலகப் பிரிவுகளுக்கு மண்சரிவு சிவப்பு எச்சரிக்கை விடுக்கப்பட்டுள்ளது. 

அதன்படி, கண்டி மாவட்டத்தின் தொலுவ, உடதும்பர, மடதும்பர மற்றும் மினிப்பே ஆகிய இடங்களுக்கும் நுவரெலியா மாவட்டத்தின் வலப்பனை, ஹங்குரன்கெத்த, நில்தந்தஹின்ன மற்றும் மதுரட்ட பிரதேச செயலகப் பிரிவுகளுக்கும் சிவப்பு எச்சரிக்கை விடுக்கப்பட்டுள்ளது.

இந்நிலையில், வீடுகள் மற்றும் கட்டடங்களில் விரிசல்கள் உள்ள இடங்களுக்குச் செல்ல வேண்டாம் எனவும், அண்மைய நாட்களில் பெய்த பலத்த மழையால் பல பகுதிகளில் மண்சரிவு ஏற்படுவதற்கான ஆரம்ப அறிகுறிகள் காணப்படுவதாகவும் அதனால் அபாயகரமான பகுதிகளில் மிகுந்த அவதானத்துடன் செயற்படவேண்டும் என்றும் தேசிய கட்டிட ஆராய்ச்சி நிறுவனம் பொதுமக்களை கேட்டுக்கொண்டுள்ளது.