தவறவிடாதீர்கள்..!உடனே பதிவு செய்யுங்கள்

'வீரா 'எனும் படத்தின் மூலம் அறிமுகமாகி இருந்தாலும், சுப்பர் ஸ்டார் ரஜினிகாந்த் நடிப்பில் வெளியான 'கூலி' திரைப்படத்தில் வில்லனாக நடித்த நாகார்ஜுனாவின் மகனாக நடித்து ரசிகர்களிடம் பிரபலமான நடிகர் கண்ணா ரவி முதன்மையான வேடத்தில் நடித்திருக்கும் 'வேடுவன்' எனும் அசல் தமிழ் இணையத் தொடர் ஜீ 5 எனும் இணையதளத்தில் எதிர்வரும் ஒக்டோபர் மாதம் பத்தாம் திகதி முதல் ஒளிபரப்பப்படுகிறது என்பதை அதிகாரப்பூர்வமாக டிஜிட்டல் தளத்தினர் அறிவித்துள்ளனர்.

இயக்குநர் பவன் இயக்கத்தில் உருவாகி உள்ள 'வேடுவன் 'எனும் அசல் தமிழ் இணையத் தொடரில் கண்ணா ரவி , சஞ்சீவ் வெங்கட், ஐஸ்வர்யா ரகுபதி,  வினுஷா தேவி, லாவண்யா, ரேகா நாயர், பார்வதி, ஜீவா ரவி உள்ளிட்ட பலர் நடித்திருக்கிறார்கள். ஸ்ரீநிவாசன் தேவராஜ் ஒளிப்பதிவு செய்திருக்கும் இந்த இணையத் தொடருக்கு விபின் பாஸ்கர் இசையமைத்திருக்கிறார். ஜீ 5  டிஜிட்டல் தளத்திற்காக ரைஸ் ஈஸ்ட் என்டர்டெய்ன்மென்ட் நிறுவனம் சார்பில் தயாரிப்பாளர் ஸ்ரீநிதி சாகர் இந்த 'வேடுவன்' எனும் இணையத் தொடரை தயாரித்திருக்கிறார்.

ஜீ 5 டிஜிட்டல் தளத்தில் அசலான தமிழ் இணையத் தொடர்கள் வெளியாகி ரசிகர்களை தொடர்ந்து உற்சாகப்படுத்தி வருகிறது. அந்த வரிசையில் புதிய இணைய தொடரான 'வேடுவன்' ஒளிபரப்பாக உள்ளது .இதனை பார்வையாளர்களிடத்தில் அறிமுகப்படுத்தும் வகையில் இந்த இணையத் தொடரின் டீசர் வெளியிடப்பட்டுள்ளது. இந்த டீசர் இணையத் தொடரை பார்வையிட வேண்டும் என்ற ஆர்வத்தை ஏற்படுத்தியிருக்கிறது.

'வேடுவன்' இணைய தொடர் குறித்து நாயகன் கண்ணா ரவி பேசுகையில், '' இது ஒரு மனிதனின் பயணத்தை பற்றிய கதை மட்டுமல்ல. அவன் எடுக்கும் முடிவுகள் -அதன் விளைவுகள்- ஆகிய இரண்டிலும் அதில் எது தவறு? எது சரி? என்பதனை ஆராயும் மெல்லிய கோடு தான் இந்த இணையத் தொடரின் சாராம்சம்'' என்றார்.