தவறவிடாதீர்கள்..!உடனே பதிவு செய்யுங்கள்

இயக்குநரும், நடிகருமான செல்வராகவன் கதையின் நாயகனாக அழுத்தமான வேடத்தில் நடித்திருக்கும் புதிய திரைப்படத்திற்கு 'மனிதனும் தெய்வமாகலாம் ' என பெயரிடப்பட்டு அதன் ஃபர்ஸ்ட் லுக் வெளியிடப்பட்டுள்ளது.  இதனை சிறந்த நடிகருக்கான தேசிய விருதை வென்ற நடிகர் தனுஷ் - அவருடைய சமூக வலைதள பக்கத்தில் வெளியிட்டு, படக் குழுவினருக்கு வாழ்த்து தெரிவித்திருக்கிறார்.

இயக்குநர் டென்னிஸ் மஞ்சுநாத் இயக்கத்தில் உருவாகி வரும் 'மனிதனும் தெய்வமாகலாம்' எனும் திரைப்படத்தில் செல்வராகவன், குஷி ரவி, வை. ஜி. மகேந்திரன், மைம் கோபி, கௌசல்யா, சதீஷ், லிர்திகா,  என். ஜோதி கண்ணன் உள்ளிட்ட பலர் நடித்துள்ளனர். கே ரவிவர்மா ஒளிப்பதிவு செய்திருக்கும் இந்த திரைப்படத்திற்கு ஏ.கே. பிரியன் இசை அமைத்திருக்கிறார்.  இந்த திரைப்படத்தை வியோம் என்டர்டெய்ன்மென்ட் நிறுவனம் சார்பில் தயாரிப்பாளர் விஜயா சதீஷ் தயாரித்திருக்கிறார்.

படத்தைப் பற்றி இயக்குநர் பேசுகையில், ''கிராமத்தில் நிகழும் பேரிடரால் அங்கு மக்களிடையே ஒற்றுமை குலைகிறது. இதனை தொடர்ந்து நாயகன் மக்களின் ஆதரவுடன் தனது கிராமத்தை காப்பாற்ற முடிவெடுக்கிறான். இது அவனை எப்படி தெய்வமாக உயர்த்துகிறது என்பதே இப்படத்தின் கதை ''என்றார்.

இப்படத்தின் படப்பிடிப்பு பணிகள் நிறைவடைந்து தற்போது படப்பிடிப்பு பிந்தைய தொழில்நுட்ப பணிகள் விறுவிறுப்பாக நடைபெற்று வருகிறது. இந்நிலையில் இப்படத்தின் டைட்டில் மற்றும் ஃபர்ஸ்ட் லுக்கை படக் குழுவினர் வெளியிட்டுள்ளனர். விரைவில் படத்தின் டீசர் வெளியாகும் என எதிர்பார்க்கப்படுகிறது.