தவறவிடாதீர்கள்..!உடனே பதிவு செய்யுங்கள்

உலக இளைஞர் தினம் இன்று (ஆகஸ்ட் 12)

ஒவ்வொரு மனித சமுதாயத்தின் வளர்ச்சிக்கான சக்தி, கனவுகளால் மட்டுமல்ல, அந்தக் கனவுகளை செயலாக்கும் இளைஞர்களால்தான் அமைகிறது. உலகளவில் இளைஞர்களின் சமூக, பொருளாதார, அரசியல் பங்களிப்பை முன்னிறுத்தும் வகையில், ஒவ்வோர் ஆண்டும் ஆகஸ்ட் 12ஆம் திகதி உலக இளைஞர் தினம் (International Youth Day) கொண்டாடப்படுகிறது. இது ஐக்கிய நாடுகள் சபையால் 1999ஆம் ஆண்டு அறிவிக்கப்பட்டது. 

உலக இளைஞர்களின் எதிர்பார்ப்பு, சவால்கள், சமூக பங்களிப்பு போன்றவற்றைப் பொதுவாக உலகம் அறியச் செய்தலே இதன் முக்கிய நோக்கம். 

மேலும், இளைஞர்கள் எதிர்நோக்கும் வேலைவாய்ப்பு குறைபாடு, கல்வி வாய்ப்புகளைப் பெறுவதில் பிரச்சினைகள், பாலின சமத்துவமின்மை, மன அழுத்தம், அரசியல் புறக்கணிப்பு போன்றவற்றில் விழிப்புணர்வை ஏற்படுத்தும் நோக்கத்துடன் இத்தினம் கடைப்பிடிக்கப்படுகிறது.

உலகளவில் சுமார் 1.8 பில்லியன் இளைஞர்கள் உள்ளனர். அவர்களில் பெரும்பாலானோர் வளர்ந்துவரும் நாடுகளில் வாழ்கிறார்கள்.

UNESCO மற்றும்  ILO அறிக்கைகள் இளைஞர்கள் அதிகரித்த வேலைவாய்ப்புத் துறைகளில் திறன் மற்றும் பயிற்சி தேவை என்பதை வலியுறுத்துகின்றன.

இளைஞர்கள் எதிர்கொள்ளும் முக்கிய சவால்கள்

வேலைவாய்ப்பு பற்றாக்குறை

ILO (International Labour Organization) 2024 அறிக்கையின்படி, உலகளவில் இளைஞர் வேலைவாய்ப்பு இல்லாதவர்களின் வீதம் 13% ஆகும். அதே சமயம், வேலைக்காக தற்காலிக வேலைகள் (Gig Economy) மற்றும் தற்செயல் வேலைகள் (Informal jobs) அதிகரித்து வருவதால், இளைஞர்களுக்கு பங்கு பெறும் தொழில்துறை நிலைதடுமாறுகிறது.

உதாரணமாக, COVID - 19,ன் பின்விளைவாக பல இடங்களில் இளைஞர்கள் வேலைவாய்ப்பினை இழந்து பாதிக்கப்பட்டனர். இந்தியாவில் மட்டும் 2022ஆம் ஆண்டில் இளைஞர் வேலைவாய்ப்பு 5% குறைந்தது.

டிஜிட்டல் வேறுபாடு (Digital Divide) :

2023ஆம் ஆண்டில் World Economic Forum  வழங்கிய தகவல், கிராமப்புற 40% இளைஞர்கள் ஒன்லைன் கல்வி மற்றும் தொழில்நுட்ப வசதிகளுக்கு அணுகல் இல்லாத நிலைமை உள்ளது என்று காட்டுகிறது.

இலங்கையில் "Digital Divide"க்கான அரசு திட்டம் 2023இல் தொடங்கப்பட்டது. ஆனால், இன்னும் பெரும்பான்மையினர் சமூக வலைத்தளங்கள் உட்பட பல தளங்களில் வாய்ப்பு குறைவு என்கின்றனர்.

மனநலப் பிரச்சினைகள்

மனநலம் தொடர்பான உலகளாவிய ஆய்வுகளின்படி, (WHO 2023), இளம் வயதுக்குட்பட்டவர்களில் (15-24 வயது  இளைஞர்களில் 25% மன அழுத்தம் மற்றும் மன ஆரோக்கிய குறைபாடுகள் அடிக்கடி ஏற்படுகின்றன. தற்கொலையில் இளைஞர்களே அதிகம் ஈடுபடுகின்றனர். 

அரசியல் புறக்கணிப்பு

2024ஆம் ஆண்டில் நடைபெற்ற பல உலகப் பொருளாதார மாநாடுகளில் இளைஞர்களின் அரசியல் பங்கு குறைவாகும். அவர்கள் தங்களது கருத்துக்கள் புறக்கணிக்கப்பட்டமை தொடர்பில் சந்தித்த சவால்களையும் விவாதித்துள்ளனர்.

இலங்கையில் இளைஞர்கள் அரசியல் முடிவுகளுக்கு அதிக பங்களிப்பு கொடுக்க விரும்புகின்றனர். ஆனால், இடைநிலை வழிகாட்டல்கள் குறைவு மற்றும் அரசியல் சூழல் காரணமாக சவால்களை சந்திக்கின்றனர்.

இளைஞர்கள் மாற்றத்தை ஏற்படுத்தும் சக்தியாக...

சுற்றுச்சூழல் பாதுகாப்பு 

Greta Thunberg போன்ற இளைஞர்கள், சூழலியல் செயற்பாட்டாளர்கள் உலகளாவிய பருவநிலை மாற்றத்தை தடுக்க போராடி வருகிறார்கள். 

2023இல் Sri Lanka Youth, Climate Action Network ஒருங்கிணைப்பில் பிளாஸ்டிக் தடுப்பு இயக்கம் நாட்டில் பல இடங்களில் வெற்றிகரமாக நடைபெற்று வருகிறது.   

மனநலம் மற்றும் விழிப்புணர்வு

2023இல் இலங்கையில் ஆரம்பிக்கப்பட்ட Youth Mental Health Initiative மூலம் இளைஞர்களுக்கு ஒன்லைன் ஆலோசனை மற்றும் குழு சிகிச்சை வழங்கப்படுகிறது.

உலகளவில் Mental Health Awareness என்ற சமூக ஊடக இயக்கம் 2024ஆம் ஆண்டிலும் அதிகம் வளர்ந்து, இளைஞர்களின் மனநலத்தை மேம்படுத்த உதவுகிறது.

சமூக ஊடகங்கள் வழியாக மாற்றம்

2024இல்  FaceBook, YouTube ஆகியவற்றில் சமூக நீதி, கல்வி, அரசியல் விழிப்புணர்வு போன்ற விடயங்களைப் பற்றி பல இளைஞர்கள் ஆடியோ-வீடியோ வடிவில் செய்தி பரப்பி வருகிறார்கள்.

இலங்கையில் சமூக ஊடகங்களை பயன்படுத்தி கல்வி ஆதரவு இயக்கங்கள் 2023இல் அதிகரித்துள்ளன.

தன்னார்வ இயக்கங்கள்:

Red Cross Youth Sri Lanka கடந்த வருடம் கொரோனா தடுப்பு நடவடிக்கைகளில் முக்கிய பங்கு வகித்தது.

2024இல் NSS (National Service Scheme)இளைஞர்கள் நாட்டில் பல சமூக சேவை திட்டங்களை நடத்தி வருகின்றனர்.

இலங்கை இளைஞர்கள் – சமகால முன்னேற்றங்கள்

இலங்கை இளைஞர்களின் தொழில்நுட்பத் திறன்களை மேம்படுத்த “Skills for Future” என்ற திட்டம் 2023இல் அரசால் அறிமுகப்படுத்தப்பட்டது. இதன் மூலம் பல இளைஞர்கள் தொழில்நுட்ப, தொழில் முனைவோர் திறன்களை கற்றுக்கொண்டுள்ளனர். Startups துறையில் இலங்கை இளைஞர்கள் 2024இல் மிகச் சிறந்த முன்னேற்றங்களைச் செய்துள்ளனர். புது தொழில்நுட்பம் கொண்டு வரும் நிறுவனங்கள் அதிகரித்துள்ளன. இலங்கை இளைஞர்களால் முன்னெடுக்கப்படும் விவசாயத் தொழில்கள், சுற்றுச்சூழல் சிந்தனையுடன் இணைந்து வளர்கின்றன.

சமூக மற்றும் கலாசார விழாக்களில் இளைஞர்கள் முக்கிய பங்காற்றி, நாட்டின் ஒற்றுமையை ஊக்குவிக்கின்றனர்.

இளைஞர்களே எதிர்காலத்தின் தூண்கள்

உலகம் இன்று எதிர்கொள்ளும் பருவநிலை மாற்றம், அமைதியின் இழப்பு, வேளாண்மை நெருக்கடி, வேலைவாய்ப்பு பற்றாக்குறை போன்ற பிரச்சினைகளுக்கு தீர்வுகளை உருவாக்குபவர்கள் இளைஞர்களே. அவர்களுக்கான உற்சாகம், வழிகாட்டுதல் மற்றும் தகுந்த இடம் வழங்கப்பட்டால், உலகம் ஒரு புதிய சகாப்தத்தை நோக்கிப் பயணிக்கும். அதனால்தான், உலக இளைஞர் தினம் என்பது ஒரு விழிப்புணர்வு நாள் மட்டுமல்ல, அது ஒரு இயக்கம் – நம் எதிர்காலத்தை வடிவமைக்கும் இயக்கம்!

- நடராசா கோபிராம்

உளவியல் சிறப்புக் கலை மாணவன்                                             

யாழ்ப்பாண பல்கலைக்கழகம்.