தவறவிடாதீர்கள்..!உடனே பதிவு செய்யுங்கள்

சுப்பர் ஸ்டார் ரஜினிகாந்த் நடிப்பில் தயாராகி எதிர்வரும் ஓகஸ்ட் மாதம் 14 ஆம் திகதியன்று உலகம் முழுவதும் தமிழ், தெலுங்கு, மலையாளம், கன்னடம், இந்தி ஆகிய மொழிகளில் வெளியாகும் 'கூலி' திரைப்படத்தில் இடம்பெற்ற 'மோனிகா ' எனும் இரண்டாவது பாடலும், பாடலுக்கான பிரத்யேக காணொளியும் வெளியிடப்பட்டுள்ளது.

இந்திய திரையுலகின் முன்னணி நட்சத்திர இயக்குநரான லோகேஷ் கனகராஜ் இயக்கத்தில் உருவாகியுள்ள 'கூலி' திரைப்படத்தில் ரஜினிகாந்த் , நாகார்ஜுனா , சத்யராஜ்,  உபேந்திரா , சௌபின் சாகிர் , சுருதிஹாசன் , காளி வெங்கட் உள்ளிட்ட ஏராளமான நட்சத்திர பட்டாளங்கள் நடித்திருக்கிறார்கள். இவர்களுடன் பொலிவுட் திரையுலகின் முன்னணி நட்சத்திர நடிகரான அமீர் கான் சிறப்பு தோற்றத்தில் நடித்திருக்கிறார். கிரீஷ் கங்காதரன் ஒளிப்பதிவு செய்திருக்கும் இந்த திரைப்படத்திற்கு அனிருத் இசையமைத்திருக்கிறார். எக்சன் என்டர்டெய்னராக தயாராகி இருக்கும் இந்த திரைப்படத்தை சன் பிக்சர்ஸ் நிறுவனம் சார்பில் தயாரிப்பாளர் கலாநிதி மாறன் தயாரித்திருக்கிறார்.

இப்படத்தின் முதல் பாடல் வெளியாகி பெரும் வரவேற்பை பெற்ற நிலையில் தற்போது இப்படத்தில் இடம்பெற்ற ' மோனிகா பெலூச்சி..' எனத் தொடங்கும் இரண்டாவது பாடலும், பாடலுக்கான பிரத்யேக விடியோவும் வெளியிடப்பட்டிருக்கிறது.

இந்த பாடலை பாடலாசிரியர் விஷ்ணு எடவன் எழுத, பின்னணி பாடகரும் இசையமைப்பாளருமான அனிருத் பாடகர் - அசல் கோலார் மற்றும் பின்னணி பாடகி சுப்லாஷினி ஆகியோர் இணைந்து பாடியிருக்கிறார்கள்.

இந்தப் பாடலும் அனிருத்தின் ஃபேவரைட்டான ஸ்டைலான துள்ளலிசை பாணியில் அமைந்திருப்பதால் ரசிகர்களிடத்தில் குறிப்பாக இணைய தலைமுறை ரசிகர்களிடத்தில் பெரும் வரவேற்பை பெற்றிருக்கிறது. அத்துடன் இந்தப் பாடல் வெளியாகி குறுகிய கால அவகாசத்திற்குள் ஐந்து மில்லியனுக்கும் மேற்பட்ட பார்வையாளர்களால் பார்வையிடப்பட்டு சாதனையும் படைத்திருக்கிறது.