(Vijithaa)
காய்ச்சல் மற்றும் இருமல் காரணமாக மஹியங்கனை ஆதார வைத்தியசாலையில் அனுமதிக்கப்பட்ட 16 வயது சிறுமி கடந்த 7 ஆம் திகதி உயிரிழந்துள்ளார்.
இவ்வாறு உயிரிழந்த சிறுமி மஹியங்கனை அளுத்ராம பகுதியை சேர்ந்த பதலயாய மத்திய மகா வித்தியாலயத்தில் தரம் 11 இல் கல்வி பயிலும் மாணவி என தெரிவிக்கப்படுகின்றது.
காய்ச்சல் மற்றும் இருமல் காரணமாக கடந்த 5 ஆம் திகதி மஹியங்கனை ஆதார வைத்தியசாலையில் அனுமதிக்கப்பட்ட குறித்த மாணவிக்கு தொடர்ந்து வழங்கப்பட்ட தடுப்பூசியின் போது பல முறை அவரின் உடலில் பல கொப்பளங்கள் ஏற்பட்டுள்ளதாக அவரின் பெற்றோர் தெரிவித்துள்ளனர்.
கடந்த 6 ஆம் திகதி நள்ளிரவில் வழங்கப்பட்ட தடுப்பூசியின் பின்னர் அவரது உடல் நிலைமை மிகவும் கவலைக்கிடமாக மாறியதாகவும் 7 ஆம் திகதி அதிகாலை 2.00 மணியளவில் உயிரிழந்துள்ளதாக பெற்றோர் தெரிவித்தனர்.
மஹியங்கனை ஆதார வைத்தியசாலை வைத்திய அதிகாரி ஏ எம் சேனாரத்ன பண்டார இக்குற்றச்சாட்டு தொடர்பில் தெரிவித்ததாவது,
இம் மரணம் தொடர்பாக எமது நீதிமன்ற வைத்திய அதிகாரியினால் மரணப்பரிசோதனை மேற்கொள்ளப்பட்டுள்ளது. அதில் மரணமடைந்த மாணவி நிமோனியாவினால் பீடிக்கப்பட்டு நுரையீரல் மற்றும் முக்கிய உறுப்புக்கள் பாதிப்படைந்தே மரணமடைந்துள்ளார் என உறுதிசெய்யப்பட்டுள்ளது என தெரிவிக்கப்படுகின்றது.
