தவறவிடாதீர்கள்..!உடனே பதிவு செய்யுங்கள்

இலங்கை வங்கி (BOC), பயோடைவர்சிட்டி ஶ்ரீலங்கா (BSL) மற்றும் கடல் சுற்றுச்சூழல் பாதுகாப்பு ஆணையம் (MEPA) ஆகியவை இணைந்து, 2025 மே 3ஆம் தேதி பேருவளையில் உள்ள கெச்சிமலை கடற்கரை பகுதியில் கடற்கரை சுத்திகரிப்பு மற்றும் விழிப்புணர்வு நிகழ்வை ஏற்பாடு செய்தன. 

இந்த நிகழ்வு, “நமது கடற்கரைகளுக்கு உயிர்கொடுப்போம்” எனும் தேசிய சுற்றுச்சூழல் முயற்சியின் ஒரு பகுதியாகும். இந்த முயற்சி, தொடர்ந்து உள்ளூர் செயற்பாடுகளின் ஊடாக கடலோர பகுதிகளை சுத்தமாகவும் பாதுகாப்பாகவும் பராமரிக்க வகை செய்கிறது.

இந்த ஆண்டின் முக்கிய அம்சமாக, 2025ஆம் ஆண்டுக்காக ஒரு கடற்கரை பராமரிப்பாளர் நியமிக்கப்பட்டார். கெச்சிமலை கடற்கரையை நாள்தோறும் சுத்தம் செய்து பராமரிப்பது இவருடைய பொறுப்பாகும். இந்தப் பொறுப்புக்கான நபர் உள்ளூர் சமூகத்திலிருந்து தேர்ந்தெடுக்கப்பட்டார். 

இந்த முயற்சி, இலங்கை வங்கி மற்றும் பயோடைவர்சிட்டி ஶ்ரீலங்கா என்பவற்றுக்கிடையிலான ஒப்பந்தத்தின் கீழ் நடைமுறைப்படுத்தப்படுகிறது. இதற்கான தொழில்நுட்ப வழிகாட்டுதலை MEPA வழங்குகிறது.

இத்திட்டம் ஐக்கிய நாடுகள் அறிவித்த மூன்று முக்கிய நிலையான வளர்ச்சி இலக்குகளை முன்னிறுத்தும் வகையில் செயற்படுத்தப்பட்டது.

அந்த வகையில் கடல் மற்றும் கடற்கரை பகுதிகளை பாதுகாப்பதன் மூலம், SDG 14 (கடலடித்தள உயிரிகள்) கடற் சூழலை பாதுகாத்து புனரமைத்து நிலையாக நிர்வகிக்கும்பொருட்டு இணைந்து செயற்படுவதன் மூலம் SDG 17 (இலக்குகளுக்கான கூட்டாண்மை), வாழ்வாதார வாய்ப்புகளை உருவாக்குவதன் மூலம் SDG 1 (வறுமையற்ற உலகம்) ஆகிய நிலைபேறான அபிவிருத்தி இலக்குகள் எட்டப்பட்டுள்ளன. 

மே 3ஆம் திகதி நடைபெற்ற நிகழ்வில் இலங்கை வங்கியின் ஊழியர்கள், BSL மற்றும் MEPA-இன் பிரதிநிதிகள், உள்ளூர் நிர்வாக அதிகாரிகள், பள்ளி மாணவர்கள் மற்றும் பொதுச் சமூகத் தன்னார்வலர்கள் ஆகியோர் பங்கேற்றனர்.

நிகழ்வின் போது, கடற்கரை கழிவுகள் அகற்றப்பட்டதோடு கடல் மாசுபாடு குறித்த விழிப்புணர்வு அமர்வுகளும் சுற்றுச்சூழலை பாதுகாக்க சமூக பங்கேற்பின் முக்கியத்துவம் குறித்து கலந்துரையாடல்களும் இடம்பெற்றன.

இந்தக் கடற்கரை பராமரிப்பாளர் மாதிரித் திட்டம் வருடம் முழுவதும் பரிசீலனை செய்யப்படும். இது வெற்றிகரமாக அமையுமாயின், நாட்டின் பிற கடற்கரை பகுதிகளிலும் விரிவாக்கப்படும். சமூக பங்கேற்பும் நிறுவன ஆதரவும் ஒருங்கிணைந்து செயற்படும் இந்த முயற்சி, எதிர்காலத்தில் சுற்றுச்சூழல் பொறுப்புணர்வை நடைமுறையில் கொண்டு வரும் சிறந்த முன்னுதாரணமாக அமையும்.