தவறவிடாதீர்கள்..!உடனே பதிவு செய்யுங்கள்

(எம்.மனோசித்ரா)

கொட்டாஞ்சேனை பிரதேசத்தில் தற்கொலை செய்துகொண்ட பாடசாலை மாணவி தொடர்பில் தற்போது பரவலாகப் பேசப்பட்டு வருகிறது. இது தொடர்பில் தேசிய சிறுவர் பாதுகாப்பு அதிகாரசபை விசேட விசாரணைகளை ஆரம்பித்துள்ளது. அத்தோடு கொட்டாஞ்சேனை மற்றும் பம்மபலப்பிட்டி பொலிஸாரிடமிருந்து விசாரணை அறிக்கையும் கோரப்பட்டுள்ளது.

பாடசாலைகளுக்குள் இடம்பெறும் மாணவர் மீதான துன்புறுத்தல்கள் தொடர்பில் தெரியப்படுத்தாமல், பாடசாலையின் நற்பெயரைப் பாதுகாக்கும் நோக்கத்தில் முறைப்பாட்டாளர்களை பலவீனப்படுத்துவதற்கான செயற்பாடுகள் முன்னெடுக்கப்பட்டுள்ளமையை சிறுவர் பாதுகாப்பு அதிகாரசபை அவதானித்துள்ளது.

அதற்கமைய இவ்வாறான நிலைமைகளை குறைத்துக் கொள்வதற்காக கல்வி அமைச்சின் செயலாளர், சகல வலய கல்வி பணிப்பாளர்களுக்கு விசேட அறிவித்தல்கள் வழங்கப்பட்டுள்ளது. மாணவர்களுக்கெதிரான ஏதேனுமொரு சம்பவம் பதிவான உடனேயே பாடசாலை அதிபரால் அல்லது பொறுப்பு கூற வேண்டிய தரப்பினரால் சிறுவர் அதிகாரசபையின் 1929 என்ற அவசர தொலைபேசி இலக்கத்துக்கு அறிவிக்க வேண்டும்.

அல்லது ncpa@childprotection.gov.lk  என்ற மின்னஞ்சல் முகவரியின் ஊடாக தெரியப்படுத்த வேண்டும். சிறுவர் துஷ்பிரயோகம் அல்லது துன்புறுத்தலுடன் தொடர்புடைய அதிபர் அல்லது ஆசிரியர்கள் சம்பவம் குறித்த வழக்கு விசாரணை நிறைவடையும் வரை மாணவர்களுடன் செயற்படுவதை தடுப்பதற்கான நடவடிக்கைகள் முன்னெடுக்கப்பட வேண்டும்.

அதிபர் அல்லது ஆசிரியர்களுக்கு எதிராக ஒழுக்காற்று நடவடிக்கை எடுக்கப்படும் சந்தர்ப்பத்தில் மாணவர்கள் மேலும் பாதிக்கப்படாமலிருப்பது உறுதிப்படுத்தப்பட வேண்டும். சிறுவர் அதிகாரசபை அல்லது பொலிஸாரால் விசாரணைகள் முன்னெடுக்கப்படும் போது எக்காரணத்துக்காகவும் மாணவர்களை பாடசாலையை விட்டு நீக்குவதற்கு நடவடிக்கை எடுக்கப்படக் கூடாது எனத் தெரிவிக்கப்பட்டுள்ளது.