தவறவிடாதீர்கள்..!உடனே பதிவு செய்யுங்கள்

'மைனா' படத்தின் மூலம் தமிழ் திரையுலக இரசிகர்களுக்கு அறிமுகமாகி பிரபலமானவர் நடிகர் சேது. இவர் சிறிய இடைவெளிக்குப் பிறகு கதையின் நாயகனாக நடித்திருக்கும் 'மையல் ' எனும் திரைப்படத்தின் இசை மற்றும் முன்னோட்ட வெளியீட்டு விழா சென்னையில் சிறப்பாக நடைபெற்றது.

இந்நிகழ்வில் இயக்குனரும் நடிகருமான கே.எஸ்.ரவிக்குமார் சிறப்பு அதிதியாக பங்கு பற்றி படத்தின் இசை மற்றும் முன்னோட்டத்தை வெளியிட்டார்.

இயக்குநர் ஏ.பி.ஜி.ஏழுமலை இயக்கத்தில் உருவாகியுள்ள மையல் திரைப்படத்தில் சேது, சம்ரித்தி தாரா, ரத்னகலா, பி எல் தேனப்பன், சூப்பர் குட் சுப்பிரமணி, சி எம் பாலா ஆகியோர் முக்கிய வேடங்களில் நடித்திருக்கிறார்கள்.

பாலா பழனியப்பன் ஒளிப்பதிவு செய்திருக்கும் இந்த திரைப்படத்திற்கு அறிமுக இசையமைப்பாளர் எஸ்.அமரகீத் இசையமைத்திருக்கிறார். இவர் இசையமைப்பாளர் சௌந்தர்யனின் வாரிசு என்பது கவனிக்கத்தக்கது.

கிராமிய பின்னணியில் யதார்த்த மனிதர்களின் வாழ்வியலை மையப்படுத்திய இந்த திரைப்படத்தை ஐகான் சினி கிரியேஷன்ஸ் நிறுவனம் சார்பில் தயாரிப்பாளர்கள் அனுபமா விக்ரம் சிங் மற்றும் ஆர்.வேணுகோபால் ஆகியோர் இணைந்து தயாரித்திருக்கிறார்கள்.

அனைத்து பணிகளும் நிறைவடைந்து வெளியீட்டிற்காக காத்திருக்கும் இந்த திரைப்படத்தின் இசை மற்றும் முன்னோட்ட வெளியிட்டு விழா சென்னையில் நடைபெற்றது.

இந்நிகழ்வில் இயக்குநரும், நடிகருமான கே. எஸ். ரவிக்குமார், ஆர். வி. உதயகுமார், பேரரசு , ஆர். கே. செல்வமணி, தயாரிப்பாளர் கலைப்புலி எஸ்.தாணு உள்ளிட்ட ஏராளமான பிரபலங்கள் சிறப்பு அதிதியாக படக்குழுவினருடன் பங்கு பற்றினர்.

இந்நிகழ்வில் இயக்குநர் ஏழுமலை பேசுகையில், ''இப்படம் உருவானதற்கு முழுமுதற் காரணம் கதையின் நாயகனான சேது தான். அவர்தான் தயாரிப்பாளரை தேடி கண்டறிந்து இப்படத்தின் பணிகளை தொடங்கினார். இப்படத்தின் கதை அனைவருக்கும் பிடிக்கும். நான் 'சேரன் பாண்டியன்' படத்தின் பாடல்களுக்கு இரசிகன். இதன் காரணமாகவே இப்படத்தில் இசையமைப்பாளர் சௌந்தர்யனின் மகன் அமர கீத்திற்கு வாய்ப்பளித்து அவரை அறிமுகப்படுத்துகிறேன். இந்தப் படத்தில் பாடல்கள் நன்றாக இருக்கிறது. இந்தப் பாடல்கள் வெற்றி பெற்றது போல் படமும் வெற்றி பெறும்'' என்றார்.