தவறவிடாதீர்கள்..!உடனே பதிவு செய்யுங்கள்

(நெவில் அன்தனி)

19 வயதுக்குட்பட்ட இலங்கை - பங்களாதேஷ் அணிகளுக்கு இடையில் கொழும்பு, கோல்ட்ஸ் கிரிக்கெட் கழக மைதானத்தில் இன்று புதன்கிழமை (30) நடைபெற்ற மூன்றாவது  இளையோர்  சர்வதேச ஒருநாள் கிரிக்கெட் போட்டியில் டக்வேர்த் லூயிஸ் முறைமை (DLS) பிரகாரம் 39 ஓட்டங்களால் 19 வயதுக்குட்பட்ட பங்களாதேஷ் அணி வெற்றிபெற்றது.

இந்த வெற்றியுடன் 6 போட்டிகள் கொண்ட இளையோர் சர்வதேச ஒருநாள் கிரிக்கெட் தொடரில் 2 - 1 என்ற ஆட்டங்கள் வித்தியாசத்தில் 19 வயதுக்குட்பட்ட பங்களாதேஷ் அணி முன்னிலையில் இருக்கிறது.

மழை மற்றும் போதிய வெளிச்சமின்மை காரணமாக தடைப்பட்ட இப் போட்டியில் முதலில் துடுப்பெடுத்தாடிய 19 வயதுக்குட்பட்ட பங்களாதேஷ் அணி 28 ஓவர்களில் 2 விக்கெட்களை  இழந்து 144 ஓட்டங்களைப் பெற்றது.

இதில் அணித் தலைவர் அஸிஸுல் ஹக்கிம் ஆட்டம் இழக்காமல் 67 ஓட்டங்களையும் ஸவாத் அப்ரார் 38 ஓட்டங்களையும் ரிஸான் ஹொசன் ஆட்டம் இழக்காமல் 24 ஓட்டங்களையும் பெற்றனர்.

மழையினால் தடைப்பட்ட இப் போட்டியில் 28 ஓவர்களில் 198 ஓட்டங்கள் என்ற திருத்தப்பட்ட வெற்றி இலக்கை நோக்கி பதிலுக்கு துடுப்பெடுத்தாடிய 19 வயதுக்குட்பட்ட இலங்கை அணி 22 ஓவர்களில் 7 விக்கெட்களை இழந்து 120 ஓட்டங்களைப் பெற்றிருந்தபோது போதிய வெளிச்சமின்மை காரணமாக ஆட்டம் முடிவுக்கு வந்தது.

அப்போது  டக்வேர்த் லூயிஸ் முறைமை பிரகாரம்   இலங்கையின் வெற்றி இலக்கு 22 ஓவர்களில் 160 ஓட்டங்களாக இருந்தது. இதற்கு அமைய19 வயதுக்குட்பட்ட இலங்கை அணி 39 ஓட்டங்களால் தோல்வியைத் தழுவியது.

துடுப்பாட்டத்தில் கவிஜ கமகே ஆட்டம் இழக்காமல் 32 ஓட்டங்களையும் ரமிரு பெரேரா 21 ஓட்டங்களையும் பெற்றனர்.

அல் பஹாத், அஸிஸுல் ஹக்கிம் ஆகிய இருவரும் 17 ஓட்டங்களுக்கு 2 விக்கெட்கள் என்ற ஒரே பந்துவீச்சுப் பெறுதிகளைக் கொண்டிருந்தனர்.