ராஜன் கதிர்காமர் வெற்றிக் கிண்ணத்தை சென். பற்றிக்ஸ் கல்லூரி சுவீகரித்தது

(என்.வீ.ஏ.)

யாழ்ப்பாணம் சென். பற்றிக்ஸ் கல்லூரிக்கும் வட்டுக்கோட்டை யாழ்ப்பாணக் கல்லூரிக்கும் இடையில் சென். பற்றிக்ஸ் கல்லூரி மைதானத்தில் சனிக்கிழமை (15) நடைபெற்ற 50 ஓவர் கிரிக்கெட் போட்டியில் 5 விக்கெட்களால் வெற்றிபெற்ற சென். பற்றிக்ஸ் கல்லூரி 24ஆவது தடவையாக ராஜன் கதிர்காமம் கிண்ணத்தை சுவீகரித்தது.

நாணய சுழற்சியில் வெற்றி பெற்ற யாழ்ப்பாணக் கல்லூரி முதலில் துடுப்பெடுத்தாடி 46.4 ஓவர்களில் சகல விக்கெட்களையும் இழந்து 153 ஓட்டங்களைப் பெற்றது.

யாழ்ப்பாணக் கல்லூரி சார்பாக மத்திய வரிசையில் ரீ. டேமியன் (36), எஸ். கபிஷன் (32), அணித் தலைவர் எஸ். மதுசன் (25) ஆகிய மூவர் 25 அல்லது அதற்கு மேற்பட்ட ஓட்டங்களைப் பெற்றனர்.

பந்து வீச்சில் சென் பற்றிக்ஸ் கல்லூரி அணி வேகப்பந்து வீச்சாளன் விஜயகுமார் இவொன் 24 ஓட்டங்ளுக்கு 4 விக்கெட்களையும் கே. லிக்ஷான் 25 ஓட்டங்களுக்கு 2 விக்கெட்களையும் கைப்பற்றினர்.

154 ஓட்டங்களை வெற்றி இலக்காகக் கொண்டு பதிலுக்கு துடுப்பெடுத்தாடிய சென். பற்றிக்ஸ் 43.5 ஓவர்களில் 5 விக்கெட்களை இழந்து 158 ஓட்டங்களைப் பெற்று வெற்றியீட்டியது.

சென். பற்றிக்ஸ் சார்பாக ஆரம்ப வீரர் எஸ். ஷியான்சன் 52 ஓட்டங்களையும் அணித் தலைவர் பற்குணம் மதுஷன் ஆட்டம் இழக்காமல் 28 ஓட்டங்கனையும் பெற்றனர்.

இப் போட்டிக்கு சென் பற்றிக்ஸ் கல்லூரியில் 1999 ஆம் ஆண்டில் சாதாரண தரத்திலும் 2002 ஆம் ஆண்டில் உயர் தரத்திலும் கல்விகற்ற மாணவர்களால் முன்னெடுக்கப்படும் இளந்தளிர் உதவும் கரங்கள் அமைப்பு பிரதான அனுசரணை வழங்கியமை குறிப்பிடத்தக்கது.