தவறவிடாதீர்கள்..!உடனே பதிவு செய்யுங்கள்

(நெவில் அன்தனி)

இலங்கைக்கும் நியூஸிலாந்துக்கும் இடையில் 1-1 என சம நிலையில் முடிவடைந்த 3 போட்டிகள் கொண்ட மகளிர் சர்வதேச ரி20 கிரிக்கெட் தொடரின் நாயகியாக சமரி அத்தபத்து தெரிவானார்.

இரண்டு அணிகளுக்கும் இடையிலான முதலாவது போட்டியில் இலங்கை மகளிர் அணி 7 விக்கெட்களால் வெற்றிபெற்றிருந்தது. அப் போட்டியில் சமரி அத்தப்பத்து ஒரு விக்கெட்டைக் கைப்பற்றியதுடன் 64 ஓட்டங்களைப் பெற்றார்.

இரண்டாவது போட்டியில் நியூஸிலாந்து மகளிர் அணி 7 விக்கெட்களால் வெற்றிபெற்று தொடரை 1 - 1 என சமப்படுத்தியது.

அப் போட்டியில் சமரி அத்தபத்து 23 ஓட்டங்களைப் பெற்றார்.

டனேடின் பல்கலைக்கழக ஓவல் மைதானத்தில் இன்று செவ்வாய்க்கிழமை (18) நடைபெற்ற கடைசிப் போட்டி மழையினால் கைவிடப்பட்டது.

இந்தப் போட்டியில் முதலில் துடுப்பெடுத்தாடிய நியூஸிலாந்து மகளிர் அணி 14.1 ஓவர்களில் 3 விக்கெட்களை மாத்திரம் இழந்து 101 ஓட்டங்களுடன் பலமான நிலையில் இருந்தபோது கடும் மழை பெய்ததால் ஆட்டம் நிறுத்தப்பட்டு பின்னர் கைவிடப்பட்டது.

துடுப்பாட்டத்தில் சுசி பேட்ஸ் 31 ஓட்டங்களையும் ஜோர்ஜியா ப்ளிம்மர் ஆட்டம் இழக்காமல் 46 ஓட்டங்களையும் பெற்றனர்.

சமரி அத்தபத்து 19 ஓட்டங்களுக்கு ஒரு விக்கெட்டைக் கைப்பற்றினார்.

இந்தத் தொடரில் 87 ஓட்டங்களை மொத்தமாக பெற்ற சமரி அத்தபத்து 2 விக்கெட்களையும் கைப்பற்றி இருந்தார். இதற்கு அமைய அவர்  தொடர்நாயகியாகத் தெரிவானார்.