தவறவிடாதீர்கள்..!உடனே பதிவு செய்யுங்கள்

இசையமைப்பாளரும், முன்னணி நட்சத்திர நடிகருமான ஜீ. வி. பிரகாஷ் குமார் கதையின் நாயகனாக நடித்திருக்கும் ' கிங்ஸ்டன் ' எனும் திரைப்படத்தில் இடம்பெற்ற ' மண்ட பத்திரம் ' எனும் பாடலும், பாடலுக்கான லிரிக்கல் வீடியோவும் வெளியிடப்பட்டிருக்கிறது.

அறிமுக இயக்குநர் கமல் பிரகாஷ் இயக்கத்தில் உருவாகியுள்ள ' கிங்ஸ்டன்' எனும் திரைப்படத்தில் ஜீ. வி. பிரகாஷ் குமார், திவ்யபாரதி, சேத்தன், அழகம்பெருமாள், இளங்கோ குமரவேல், சபுமோன் , அண்டனி , அருணாச்சலேஸ்வரன்,  ராஜேஷ் பாலச்சந்திரன் உள்ளிட்ட பலர் நடித்திருக்கிறார்கள்.

கோகுல் பினோய் ஒளிப்பதிவு செய்திருக்கும் இந்த திரைப்படத்திற்கு ஜீ. வி. பிரகாஷ் குமார் இசையமைத்திருக்கிறார். ஃபேண்டஸி என்டர்டெய்னராக தயாராகி இருக்கும் இந்த திரைப்படத்தை ஜீ ஸ்டூடியோஸ் மற்றும் பேரலல் யுனிவர்ஸ் பிக்சர்ஸ் ஆகிய நிறுவனங்கள் இணைந்து தயாரித்திருக்கிறது.

எதிர்வரும் மார்ச் மாதம் ஏழாம் திகதியன்று உலகம் முழுவதும் பட மாளிகையில் வெளியாகும் என அறிவிக்கப்பட்டிருக்கும் ' கிங்ஸ்டன் ' திரைப்படத்தில் இடம் பெற்ற ' யப்பா நான் மல்லாந்திருப்பேன் என்று நினைத்தாயோ..'  எனத் தொடங்கும் பாடலும், பாடலுக்கான லிரிக்கல் வீடியோவும் வெளியிடப்பட்டிருக்கிறது. இந்தப் பாடலை பாடலாசிரியர் கானா பிரான்சிஸ் எழுதி, அவரே பாடியிருக்கிறார். சென்னை கடற்கரையோர மக்களின் பாரம்பரிய இசை பாடலான கானா பாடலாக உருவாகி இருக்கும் இந்த பாடல் கானா பாடலை ரசிக்கும் ரசிகர்களை வெகுவாக கவர்ந்திருக்கிறது.