தவறவிடாதீர்கள்..!உடனே பதிவு செய்யுங்கள்

தமிழ் திரையுலகின் முன்னணி நட்சத்திர நடிகரான சூர்யா வித்தியாசமான கதாபாத்திரத்தில் நடித்திருக்கும் 'ரெட்ரோ' எனும் திரைப்படத்தில் இடம்பெற்ற 'கண்ணாடி பூவே' எனும் முதல் பாடலும், பாடலுக்கான லிரிக்கல் வீடியோவும் வெளியிடப்பட்டிருக்கிறது.

இயக்குநரும், தயாரிப்பாளருமான கார்த்திக் சுப்புராஜ் இயக்கத்தில் உருவாகியுள்ள 'ரெட்ரோ' எனும் திரைப்படத்தில் சூர்யா, பூஜா ஹெக்டே, ஜோஜூ ஜார்ஜ்,  ஜெயராம்,  கருணாகரன் , சுஜித் சங்கர்,  ரம்யா சுரேஷ் உள்ளிட்ட பலர் நடித்திருக்கிறார்கள்.

ஸ்ரேயா கிருஷ்ணா ஒளிப்பதிவு செய்திருக்கும் இந்த திரைப்படத்திற்கு சந்தோஷ் நாராயணன் இசையமைத்திருக்கிறார். ரொமான்டிக் வித் எக்சன் என்டர்டெய்னராக தயாராகி இருக்கும் இந்த திரைப்படத்தை 2டி என்டர்டெய்ன்மெண்ட் மற்றும் ஸ்டோன் பெஞ்ச் பிலிம்ஸ் ஆகிய நிறுவனங்கள் இணைந்து தயாரித்திருக்கிறது.

எதிர்வரும் மே மாதம் முதல் திகதியன்று உலகம் முழுவதும் படமாளிகையில் வெளியாகும் என அறிவிக்கப்பட்டிருக்கும் 'ரெட்ரோ' திரைப்படத்தில் இடம் பெற்ற 'கண்ணாலே என் கண்ணோடு மோதும் கண்ணாடி பூவே நீதான்டி..' எனத் தொடங்கும் முதல் பாடலும், பாடலுக்கான லிரிக்கல் வீடியோவும் வெளியிடப்பட்டிருக்கிறது.

இந்தப் பாடலை பாடலாசிரியர் விவேக் எழுத, இப்படத்தின் இசையமைப்பாளரும், பின்னணி பாடகருமான சந்தோஷ் நாராயணன் பாடியிருக்கிறார்.

காதலின் பிரிவையும், சோகத்தையும் முதன்மைப்படுத்திய இந்தப் பாடல் அனைத்து தரப்பு இசை ரசிகர்களையும் வெகுவாக கவர்ந்திருக்கிறது.  இதன் காரணமாக இந்தப் பாடல் வெளியான குறுகிய கால அவகாசத்திற்குள் எட்டு மில்லியனுக்கும் மேற்பட்ட பார்வையாளர்களால் பார்வையிடப்பட்டு சாதனை படைத்து வருகிறது.

இதனிடையே இந்தப் பாடல் சூர்யாவின் நடிப்பில் ஏற்கனவே வெளியான' ஏழாம் அறிவு' படத்தில் இடம்பெற்ற பாடலை நினைவுபடுத்துவதாகவும் இசை விமர்சகர்கள் இணையதளத்தில் பதிவிட்டிருக்கிறார்கள் என்பது குறிப்பிடத்தக்கது.