சாதனை படைக்கும் அஜித் குமாரின் 'விடாமுயற்சி' பட முன்னோட்டம்

Published By: Digital Desk 2

17 Jan, 2025 | 05:19 PM
image

தமிழ் திரையுலகின் முன்னணி நட்சத்திர நடிகரான அஜித்குமார் நடிப்பில் தயாராகி இருக்கும் ' விடாமுயற்சி ' எனும் திரைப்படத்தின் முன்னோட்டம் வெளியிடப்பட்டிருக்கிறது. அத்துடன் இந்த திரைப்படம் வெளியாகும் திகதியும் அதிகாரப்பூர்வமாக அறிவிக்கப்பட்டிருக்கிறது.

இயக்குநரும் ,நடிகருமான மகிழ் திருமேனி இயக்கத்தில் உருவாகி இருக்கும் ' விடாமுயற்சி ' எனும் திரைப்படத்தில் அஜித் குமார், திரிஷா , அர்ஜுன் , ரெஜினா கசண்ட்ரா,  ஆரவ், நிகில் நாயர் , தாசரதி,  கணேஷ் உள்ளிட்ட பலர் நடித்திருக்கிறார்கள். ஓம் பிரகாஷ் ஒளிப்பதிவு செய்திருக்கும் இந்த திரைப்படத்திற்கு அனிருத் இசையமைத்திருக்கிறார். 

எக்சன் என்டர்டெய்னராக தயாராகி இருக்கும் இந்த திரைப்படத்தை லைக்கா புரொடக்ஷன்ஸ் நிறுவனம் சார்பில் தயாரிப்பாளர் சுபாஷ்கரன் தயாரித்திருக்கிறார்.

ரசிகர்களின் பெரும் எதிர்பார்ப்பில் இருந்த இந்த திரைப்படம் இம்மாதம் பத்தாம் திகதியன்று உலகம் முழுவதும் பட மாளிகையில் வெளியாகும் என அறிவிக்கப்பட்டிருந்தது. ஆனால் பல்வேறு காரணங்களால் திட்டமிட்டபடி வெளியாகவில்லை.  

இந்நிலையில் இந்த திரைப்படம் எதிர்வரும் பெப்ரவரி மாதம் ஆறாம் திகதியன்று உலகம் முழுவதும் பட மாளிகையில் தமிழ் மற்றும் தெலுங்கு மொழியில் வெளியாகிறது. இதனைத் தொடர்ந்து இப்படத்தின் முன்னோட்டம் வெளியிடப்பட்டிருக்கிறது. ரசிகர்களுக்கு எக்சன் விருந்தளிக்கும் இந்த முன்னோட்டம் வெளியான குறுகிய கால அவகாசத்திற்குள் எட்டு மில்லியனுக்கும் மேற்பட்ட பார்வையாளர்களால் பார்வையிடப்பட்டு சாதனை படைத்து வருகிறது.

இதனிடையே அஜித்குமார் நடிப்பில் உருவான 'பாசமலர்கள்', 'கல்லூரி வாசல்', 'உன்னைத் தேடி', 'முகவரி', 'ஜி', 'அசல்', 'என்னை அறிந்தால்', 'வலிமை', ஆகிய படங்கள் பெப்ரவரி மாதத்தில் வெளியாகி பெரிய வெற்றியை பெற்றிருக்கிறது என்பதும், அந்த வகையில் பெப்ரவரி மாதத்தில் வெளியாகும் 'விடாமுயற்சி' எனும் திரைப்படமும் வணிக ரீதியாகவும், விமர்சன ரீதியாகவும் பாரிய வெற்றியை பெறும் என்ற எதிர்பார்ப்பு ஏற்பட்டிருக்கிறது என்பதும் குறிப்பிடத்தக்கது.

முக்கிய செய்திகள்

icon-left
icon-right