தவறவிடாதீர்கள்..!உடனே பதிவு செய்யுங்கள்

அயோத்தி- கருடன்- நந்தன்- என ஹாட்ரிக் வெற்றியை அளித்த வெற்றி நாயகனான நடிகர்  சசிகுமார் கதையின் நாயகனாக நடித்து வரும் 'டூரிஸ்ட் ஃபேமிலி ' எனும் திரைப்படத்தின் படப்பிடிப்பு நிறைவடைந்ததாக படக் குழுவினர் பிரத்யேக புகைப்படத்தை வெளியிட்டு உற்சாகத்துடன் தெரிவித்துள்ளனர்.

அறிமுக இயக்குநர் அபிஷன் ஜீவீந் இயக்கத்தில் உருவாகி வரும் 'டூரிஸ்ட் ஃபேமிலி' எனும் திரைப்படத்தில் சசிகுமார், சிம்ரன், யோகி பாபு ,மிதுன் ஜெய்சங்கர் ,கமலேஷ், எம். எஸ். பாஸ்கர், ரமேஷ் திலக், பக்ஸ், இளங்கோ குமரவேல், ஸ்ரீஜா ரவி உள்ளிட்ட பலர் நடித்திருக்கிறார்கள்.

அரவிந்த் விஸ்வநாதன் ஒளிப்பதிவு செய்திருக்கும் இந்த திரைப்படத்திற்கு ஷான் ரோல்டன் இசையமைத்திருக்கிறார்.

இந்த திரைப்படத்தை மில்லியன் டொலர் ஸ்டுடியோஸ் மற்றும் எம் ஆர் பி என்டர்டெய்ன்மென்ட் நிறுவனம் சார்பில் தயாரிப்பாளர்கள் நாசரேத் பஸ்லியான்- மகேஷ் ராஜ் பஸ்லியான் , யுவராஜ் கணேசன் ஆகியோர் இணைந்து தயாரித்திருக்கிறார்கள்.

இப்படத்தின் முதல் தோற்றப் பார்வை மற்றும் பிரத்யேக காணொளி வெளியாகி, ரசிகர்களின் கவனத்தை ஈர்த்தது. மேலும் அந்த காணொளியில் சசிகுமார் உள்ளிட்ட கதாபாத்திரங்கள் ஈழத் தமிழில் பேசியதால் உலகத் தமிழர்களின் ஆர்வத்தை அதிகரித்தது.

இந்நிலையில் இப்படத்தின் படப்பிடிப்பு முழுமையாக நிறைவடைந்திருக்கிறது என்றும், விரைவில் படப்பிடிப்புக்கு பிந்தைய தொழில்நுட்ப பணிகள் தொடங்கும் என்றும் அறிவித்துள்ளனர்.

இதனிடையே சசிகுமாரும், சிம்ரனும் இதற்கும் முன்னர் சுப்பர் ஸ்டார் ரஜினிகாந்த் நடிப்பில் வெளியான ' பேட்ட' எனும் படத்தில் நடித்திருந்தாலும் முதன் முதலாக இவர்கள் ஜோடியாக இந்த திரைப்படத்தில் நடித்திருப்பதால் இந்த திரை ஜோடி நிகழ்த்தும் மாயஜாலத்தை ரசிக்க ரசிகர்கள் ஆர்வமுடன் காத்திருக்கிறார்கள் என்பது குறிப்பிடத்தக்கது.