தவறவிடாதீர்கள்..!உடனே பதிவு செய்யுங்கள்

சீயான் விக்ரம் கதையின் நாயகனாக காளி எனும் கதாபாத்திரத்தில் எக்சன் அவதாரத்தில் நடித்திருக்கும் 'வீர தீர சூரன், பார்ட் 2 ' எனும் திரைப்படத்தின் கிளர்வோட்டம் வெளியிடப்பட்டிருக்கிறது. இந்த கிளர்வோட்டம் வெளியான குறுகிய கால அவகாசத்திற்குள் ஐந்து மில்லியனுக்கும் மேற்பட்ட பார்வையாளர்களால் பார்வையிடப்பட்டு சாதனையும் படைத்து வருகிறது. 

இயக்குநர் எஸ். யு. அருண்குமார் இயக்கத்தில் உருவாகி வரும் 'வீர தீர சூரன் - பார்ட் 2 'எனும் திரைப்படத்தில் சீயான் விக்ரம், எஸ். ஜே. சூர்யா, சுராஜ் வெஞ்சரமூடு , துஷாரா விஜயன், சித்திக் உள்ளிட்ட பலர் நடித்திருக்கிறார்கள். 

தேனி ஈஸ்வர் ஒளிப்பதிவு செய்திருக்கும் இந்த திரைப்படத்திற்கு ஜீ. வி. பிரகாஷ் குமார் இசையமைத்திருக்கிறார். எக்சன் திரில்லர் என்டர்டெய்னராக தயாராகும் இந்த திரைப்படத்தை ஹெச். ஆர். பிக்சர்ஸ் நிறுவனம் சார்பில் தயாரிப்பாளர் ரியா ஷிபு தயாரிக்கிறார்.

'வீர தீர சூரன்  பார்ட் 2 ' படத்தின் படப்பிடிப்பு பணிகள் நிறைவடைந்து தற்போது படப்பிடிப்புக்கு பிந்தைய தொழில்நுட்ப பணிகள் விறுவிறுப்பாக நடைபெற்று வருகிறது. அடுத்த ஆண்டு ஜனவரி மாதம் வெளியாகும் என  அறிவிக்கப்பட்டிருக்கும் இப்படத்தின் கிளர்வோட்டம் வெளியிடப்பட்டிருக்கிறது. இதில் இடம் பிடித்திருக்கும் காட்சிகளில் கொமர்ஷல் அம்சங்கள் அனைத்தும் இருப்பதால் படத்தைப் பற்றிய எதிர்பார்ப்பை அதிகரித்திருக்கிறது.

இதனிடையே சீயான் விக்ரம் நடிப்பில் வெளியான ' தங்கலான் ' திரைப்படம் பான் இந்திய அளவில் வணிக ரீதியான வெற்றியை பாரிய அளவில் பெறவில்லை என்பதால் இப்படத்தின் மீதான எதிர்பார்ப்பு ரசிகர்களிடையே அதிகரித்திருக்கிறது என்பது குறிப்பிடத்தக்கது.