தவறவிடாதீர்கள்..!உடனே பதிவு செய்யுங்கள்

'ஆர் ஆர் ஆர்' படத்தின் மூலம் தமிழ் ரசிகர்களுக்கு அறிமுகமான தெலுங்கின் முன்னணி நட்சத்திர நடிகர் ராம் சரண் எக்சன் நாயகனாக நடித்திருக்கும் 'கேம் சேஞ்சர்' எனும் திரைப்படத்தில் இடம்பெற்ற 'ஹைரானா..' எனும் பாடலும் , பாடலுக்கான லிரிக்கல் வீடியோவும் வெளியிடப்பட்டிருக்கிறது.‌

பிரம்மாண்ட இயக்குநர் ஷங்கர் இயக்கத்தில் உருவாகி இருக்கும் 'கேம் சேஞ்சர்' எனும் திரைப்படத்தில் ராம் சரண், கியாரா அத்வானி, எஸ். ஜே. சூர்யா, சமுத்திரக்கனி, அஞ்சலி, நாசர், பிரகாஷ்ராஜ், ஸ்ரீகாந்த், ஜெயராம், நவீன் சந்திரா, முரளி சர்மா, ஹரிஷ் உத்தமன், சுனில் உள்ளிட்ட பலர் நடித்திருக்கிறார்கள். 

திரு மற்றும் ஆர். ரத்ன வேலு ஒளிப்பதிவு செய்திருக்கும் இந்த திரைப்படத்திற்கு எஸ் .தமன் இசையமைத்திருக்கிறார். 

அரசியல் பின்னணியில் எக்சன் என்டர்டெய்னராக தயாராகி இருக்கும் இந்த திரைப்படத்தை ஸ்ரீ வெங்கடேஸ்வரா கிரியேஷன்ஸ் நிறுவனம் சார்பில் தயாரிப்பாளர்கள் தில் ராஜு மற்றும் சிரிஷ் ஆகியோர் இணைந்து தயாரித்திருக்கிறார்கள்.

அடுத்த ஆண்டு ஜனவரி மாதம் 10 ஆம் திகதி முதல் உலகம் முழுவதும் தமிழ், தெலுங்கு, மலையாளம், கன்னடம், இந்தி ஆகிய இந்திய மொழிகளில் பட மாளிகைகளில் வெளியாகும் என அறிவிக்கப்பட்டிருக்கும் இந்த திரைப்படத்தில் இடம்பெற்ற 'அலையே ஹைரானா..'  எனத் தொடங்கும் பாடலும், பாடலுக்கான லிரிக்கல் வீடியோவும் வெளியிடப்பட்டிருக்கிறது. 

இந்த பாடலை பாடலாசிரியர் விவேக் எழுத, பின்னணி பாடகர் கார்த்திக் மற்றும் பின்னணி பாடகி ஸ்ரேயா கோஷல் ஆகியோர் இணைந்து பாடியிருக்கிறார்கள். எஸ் தமனின் மயக்கம் மெட்டில் மெல்லிசையாக உருவாகி இருக்கும் இந்த பாடல் அனைத்து இசை ரசிகர்களின் கவனத்தையும் கவர்ந்திருக்கிறது.

இதனிடையே தமிழகத்தில் அஜித்குமாரின் 'விடாமுயற்சி' திரைப்படமும், ராம்சரண் - ஷங்கர் கூட்டணியில் உருவான 'கேம் சேஞ்சர்' திரைப்படமும் ஒரே திகதியில் வெளியாவதால் ரசிகர்கள் உற்சாகமடைந்திருக்கிறார்கள் என்பது குறிப்பிடத்தக்கது.