தவறவிடாதீர்கள்..!உடனே பதிவு செய்யுங்கள்

(நெவில் அன்தனி)

நியூஸிலாந்து எதிராக நடைபெறவுள்ள இருவகை சர்வதேச மட்டுப்படுத்தப்பட்ட ஓவர்கள் தொடர்களுக்கான இலங்கை குழாம்களை ஸ்ரீலங்கா கிரிக்கெட் இன்று  அறிவித்தது.

நியூஸிலாந்துக்கு எதிராக இரண்டு சர்வதேச ரி20 போட்டிகளிலும் 3 சர்வதேச ஒருநாள் கிரிக்கெட் போட்டிகளிலும் இலங்கை விளையாடவுள்ளது.

இந்த இரண்டு வகையான தொடர்களுக்கான இரண்டு குழாம்களில் 12 வீரர்கள் இடம்பெறுகின்றனர்.

இரண்டு அணிகளுக்கும் வழமைபோல் சரித் அசலன்க தலைவராக நியமிக்கப்பட்டுள்ளார்.

சரித் அசலன்கவுடன் பெத்தும் நிஸ்ஸன்க, அவிஷ்க பெர்னாண்டோ, குசல் ஜனித் பெரேரா, குசல் மெண்டிஸ், கமிந்து மெண்டிஸ், துனித் வெல்லாலகே, வனிந்து ஹசரங்க, மஹீஷ் தீக்ஷன, ஜெவ்றி வெண்டர்சே, சமிந்து விக்ரமசிங்க, அசித்த பெர்னாண்டோ ஆகியோர் சர்வதேச ஒருநாள் கிரிக்கெட் குழாத்திலும் சர்வதேச ரி 20 குழாத்திலும் இடம்பெறுகின்றனர்.

நிஷான் மதுஷ்க, டில்ஷான் மதுஷன், மொஹமத் ஷிராஸ் ஆகியோர் ஒருநாள் குழாத்தில் மாத்திரம் இடம்பெறுவதுடன் தினேஷ் சந்திமால், பானுக்க ராஜபக்ஷ, நுவன் துஷார, மதீஷ பத்திரண, பினுர பெர்னாண்டோ ஆகியோர் ரி20 குழாத்தில் மாத்திரம் இடம்பெறுகின்றனர்.

2 போட்டிகள் சர்வதேச ரி20 தொடர் தம்புள்ளையில் நவம்பர் 9, 10ஆம் திகதிகளில் நடைபெறவுள்ளது.

3 போட்டிகள் கொண்ட சர்வதேச ஒருநாள் கிரிக்கெட் தொடரின் முதலாவது போட்டி தம்புள்ளையில் 13ஆம் திகதியும் கண்டியில் 17 மற்றும் 19ஆம் திகதிகளிலும் நடைபெறும்.