தவறவிடாதீர்கள்..!உடனே பதிவு செய்யுங்கள்

சின்னத்திரை தொடர்கள் மூலமாகவும் லட்சக்கணக்கான குடும்ப உறுப்பினர்களை ரசிகர்களாக பெற்றிருக்கும் நடிகை தேவயானி கதையின் நாயகியாக நடித்திருக்கும் புதிய திரைப்படத்திற்கு 'நிழற்குடை' என பெயர் சூட்டப்பட்டிருக்கிறது.

அறிமுக இயக்குநர் சிவா ஆறுமுகம் இயக்கத்தில் உருவாகி இருக்கும் 'நிழற்குடை ' எனும் திரைப்படத்தில் தேவயானி, விஜித், கண்மணி மனோகரன், இளவரசு, ராஜ்கபூர், மனோஜ் குமார், வடிவுக்கரசி, கவிதா ரவி, அக்ஷரா உள்ளிட்ட பலர் நடித்திருக்கிறார்கள். 

ஆர். பி. குருதேவ் ஒளிப்பதிவு செய்திருக்கும் இந்த திரைப்படத்திற்கு நரேன் பாலகுமார் இசையமைத்திருக்கிறார். 

தடம் புரளும் இன்றைய இளம் தலைமுறையினரின் வாழ்வியலை மையப்படுத்தி தயாராகி இருக்கும் இந்த திரைப்படத்தை தர்ஷன் பிலிம்ஸ் நிறுவனம் சார்பில் தயாரிப்பாளர் ஜோதி சிவா தயாரித்திருக்கிறார்.

இப்படத்தைப் பற்றி இயக்குநர் பேசுகையில், '' இன்றைய இளைய தலைமுறையினர் அதிகம் கல்வி கற்று இந்தியாவில் பணி புரியாமல் வெளிநாடுகளில் பணிபுரிய வேண்டும் என பெரு விருப்பம் கொண்டிருக்கிறார்கள். 

இவர்கள் வெளிநாட்டில் சென்று சம்பாதிக்க வேண்டும் எனும் மோகத்தினால் தங்கள் குடும்ப உறவுகளையும், பெற்றோரையும் , தங்களுடைய பிள்ளைகளையும் அரவணைப்பதில் சுணக்கம் காட்டி எப்படி தடம் மாறி பயணிக்கிறார்கள் என்பதனை மையப்படுத்தி இப்படத்தின் திரைக்கதை உருவாக்கப்பட்டு இருக்கிறது. 

குடும்ப பிரச்சனைகளுடன் எதிர்பாராத திருப்பங்களையும் இப்படத்தின் திரைக்கதையுடன் பிணைக்கப்பட்டு இருக்கிறது '' என்றார் .

இந்த திரைப்படத்தின் படப்பிடிப்பு பணிகள் நிறைவடைந்து தற்போது படப்பிடிப்புக்கு பிந்தைய தொழில்நுட்ப பணிகள் விறுவிறுப்பாக நடைபெற்று வருகிறது. விரைவில் படத்தின் டீசர் வெளியாகும் என எதிர்பார்க்கப்படுகிறது.