தவறவிடாதீர்கள்..!உடனே பதிவு செய்யுங்கள்

(எம்.மனோசித்ரா)  

ஆட்சி மாற்றத்தோடு அரச நிறுவனங்களின் முக்கிய பதவிகள் சிலவற்றில் ஏற்பட்ட வெற்றிடங்களுக்கு புதிய அதிகாரிகளை நியமிப்பதற்கு அமைச்சரவை அங்கீகாரம் வழங்கியுள்ளது. அத்தோடு ஜனாதிபதியின் சிரேஷ்ட ஆலோசகர் நியமனத்துக்கும் அமைச்சரவை அங்கீகாரம் வழங்கப்பட்டுள்ளது.  

அரசியலமைப்பின் 41ஆவது உறுப்புரையின் (01) ஆம் உப உறுப்புரையில் அதிகாரமளிக்கப்பட்டதன்  பிரகாரம் அமைச்சரவையின் கருத்துக்களைக் கேட்டறிந்து தனது பணிக்குழாமினரை நியமிப்பதற்கான அதிகாரம் ஜனாதிபதிக்கு ஒப்படைக்கப்பட்டுள்ளது.  

அதற்கமைய, கடந்த செப்டெம்பர் 24ஆம் திகதி  தொடக்கம் நடைமுறைக்கு வரும் வகையில் துமிந்த ஹூலங்கமுவ (பொருளாதார விவகாரங்கள் மற்றும் நிதி தொடர்பான ஜனாதிபதி ஆலோசகராக) மற்றும் கலாநிதி. ஏ.ஏ.ஜே. பர்னாந்து (பொருளாதார விவகாரங்கள் மற்றும் நிதி தொடர்பான ஜனாதிபதி ஆலோசகராக) சேவை அடிப்படையில் நியமிப்பதற்கு அமைச்சரவை உடன்பாடு தெரிவித்துள்ளது. இவர்கள் எவ்வித கொடுப்பனவுகளும் அற்ற அதிகாரிகளாகவே நியமிக்கப்பட்டுள்ளதாக அமைச்சரவை பேச்சாளர் விஜித ஹேரத் தெரிவித்தார்.  

மேலும் அரசாங்க தகவல் திணைக்களத்தின் பணிப்பாளர் நாயகமாக அரசாங்க தகவல் திணைக்களத்தின் பணிப்பாளர் (நிர்வாகம்) பதவியில் பணிபுரிந்த இலங்கை நிர்வாக சேவை தரம் 1 அதிகாரியான எச்.எஸ்.கே.ஜே.பண்டாரவை உடனடியாக நடைமுறைக்கு வரும் வகையில் அரசாங்க தகவல் பணிப்பாளர் நாயகமாக முழுநேரப் பதில் கடமைக்கு நியமிப்பதற்காக ஊடக அமைச்சர் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது. 

அமைச்சரவைப் பேச்சாளராக புத்தசாசன, சமய மற்றும் கலாச்சார விவகாரங்கள், தேசிய ஒருமைப்பாடு, சமூகப் பாதுகாப்பு மற்றும் வெகுசன ஊடக அமைச்சர் விஜித ஹேரத்தை  நியமிப்பதற்கு அமைச்சரவை தீர்மானித்துள்ளது.