தவறவிடாதீர்கள்..!உடனே பதிவு செய்யுங்கள்

(நெவில் அன்தனி)

ஐக்கிய அரபு இராச்சியத்தில் நடைபெறவுள்ள ஐசிசி மகளிர் ரி20 உலகக் கிண்ண கிரிக்கெட் போட்டியில் பங்குபற்றும் இலங்கை மகளிர் அணிக்கான உத்தியோகபூர்வ ஆடையை (ஜேர்சி) மூஸ் குளோதிங் நிறுவனம் வழங்கியது.

ஸ்ரீலங்கா கிரிக்கெட்டின் உத்தியோகபூர்வ ஆடை பங்காளியான மூஸ் குளோதிங் நிறுவனத்தின் நிறைவேற்றுப் பணிப்பாளர் ஹாசிப் ஓமர்,   ஸ்ரீலங்கா கிரிக்கெட் தலைமையக வளவில்       நடைபெற்ற வைபவத்தின்போது    இலங்கை மகளிர் அணிக்கான ஜேர்ஸியை அணித் தலைவி சமரி அத்தபத்துவிடம் வழங்கினார்.

இந்த வைபவத்தில் இலங்கை மகளிர் கிரிக்கெட் அணி பயிற்றுர் ருமேஷ் ரட்நாயக்கவும் கலந்துகொண்டிருந்தார்.

'இலங்கை மகளிர் அணிக்கான புதிய ரி20 உலகக் கிண்ண ஜேர்ஸியை அறிமுகப்படுத்துவதில் பெருமை அடைகிறோம்.  இலங்கையின் பெறுமதிமிக்க பாரம்பரியங்களையும் இயற்கை எழில்களையும் எடுத்துக்காட்டும் வகையில் இந்த ஜேர்சி வடிவமைக்கப்பட்டுள்ளது. பெக்கோ மலைத் தொடர், தேயிலைத் தோட்டங்கள் ஆகியவற்றின் இயற்கை காட்சிகள் இந்த ஜேர்சியில் பதிக்கப்பட்டுளளன. இந்த ஜேர்சியை வழங்கும் சந்தர்ப்பத்தில் இலங்கை அணிக்கு எமது நிலையான ஆதரவு என்றென்றும் இருக்கும் என்பதை உறுதிப்படுத்துகிறோம். அவர்கள் வெற்றிபெற்று இலங்கையின் புகழைப் பரவச் செய்வார்கள் என நம்புகிறேன்' என மூஸ் குளோதிங் நிறைவேற்றுப் பணிப்பாளர் ஹாசிப் ஒமர் தெரிவித்தார்.

ஐசிசி மகளிர் ரி20 உலகக் கிண்ண கிரிக்கெட் போட்டியில் நடப்பு சம்பியன் அவுஸ்திரேலியா, இந்தியா, நியூஸிலாந்து, பாகிஸ்தான் ஆகிய அணிகளுடன் ஏ குழுவில் இலங்கை இடம்பெறுகிறது.

ஐசிசி மகளிர் ரி20 உலகக் கிண்ணப் போட்டி ஷார்ஜாவில் எதிர்வரும் 3ஆம் திகதி ஆரம்பமாவதுடன் இலங்கை தனது முதலாவது போட்டியில் பாகிஸ்தானை அன்றைய தினம் எதிர்த்தாடுகிறது.