தவறவிடாதீர்கள்..!உடனே பதிவு செய்யுங்கள்

எதிர்வரும் 21ஆம் திகதி நடைபெறவுள்ள இலங்கையின் ஒன்பதாவது ஜனாதிபதி தேர்தல் நடவடிக்கைகளை கண்காணிப்பதற்காக சர்வதேச தேர்தல் கண்காணிப்புக் குழு ஆலோசகரும் தென்கிழக்காசிய நாடுகளுக்கான சுதந்திர தேர்தல் ஆலோசகருமான இங்கிலாந்து நாட்டைச் சேர்ந்த ஜகே பர்க்கர் சனிக்கிழமை மாலை (14) மட்டக்களப்புக்கு விஜயம் செய்தார்.

மட்டக்களப்பு மாவட்டத்தில் தேர்தல் கண்காணிப்பாளர்களுடன் கலந்துரையாடிய அவர் நேற்று மாலை காத்தான்குடி கஃபே தேர்தல் கண்காணிப்பு அலுவலகத்துக்கு சென்று, அங்கு கஃபே அதிகாரிகளுடன் பேச்சுவார்த்தை நடத்தினார். 

இச்சந்திப்பில் கஃபே தேர்தல் கண்காணிப்பு ஆலோசகர் கலாநிதி எம். தயாபரன் மற்றும் கபே மட்டக்களப்பு மாவட்ட இணைப்பாளர் தேசமானிய ஏ.எல். மீரா சாஹிபு உட்பட தேர்தல் கண்காணிப்பு அதிகாரிகள் கலந்துகொண்டனர். 

வன்முறையற்ற தேர்தல், அமைதியான முறையில் வாக்களிப்பு உட்பட பல்வேறு விடயங்கள் தொடர்பாக இதன்போது ஆலோசிக்கப்பட்டதுடன் வாக்குரிமை இல்லாத பாடசாலை மாணவர்களை தேர்தல் நடவடிக்கைகளுக்கு பயன்படுத்துவது தொடர்பாக பாடசாலை மாணவர்களால் விநியோகிக்கப்பட்ட வேட்பாளர்களின் பிரசுரங்களும் சர்வதேச கண்காணிப்பு ஆலோசகருக்கு வழங்கப்பட்டமை குறிப்பிடத்தக்கது.