தவறவிடாதீர்கள்..!உடனே பதிவு செய்யுங்கள்

இரு இளைஞர்களை மதுபோதையில் தாக்கி விட்டு தலைமறைவாக உள்ள பிரபல தென்னிந்திரைப்பட பின்னணி பாடகரான மனோவின் இரு மகன்களை பொலிஸார் கைது செய்ய நடவடிக்கை எடுத்துள்ளனர்.

நேற்று முன்தினம் இரவு மனோவின் மகன்கள் இருவரும் தங்களது வீட்டின் முன்பு நண்பர்களுடன் குடிபோதையில் நின்று பேசி கொண்டிருந்ததாக கூறப்படுகிறது. அப்போது அந்த பகுதியில் கால்பந்து பயிற்சிக்கு வந்த இளைஞர்கள் சிலர், மனோவின் வீட்டின் எதிரே உள்ள ஹோட்டலில் சாப்பிட்டு விட்டு, மனோவின் வீட்டை வேடிக்கை பார்த்தபடி நடந்து சென்றதாக தெரிவிக்கப்படுகின்றது. 

இதனை பார்த்த மனோவின் மகன்கள், எதற்காக எங்களது வீட்டை நோட்டமிட்டவாறு செல்கிறீர்கள்? என்று கேட்டு, தனது நண்பர்களுடன் சேர்ந்து இரு இளைஞர்களை பிடித்து தாக்கியதாக தெரிகிறது. இதனை கண்டதும் அவர்களுடன் வந்த நண்பர்கள் தப்பி ஓடிவிட்டனர். பின்னர் இரு இளைஞர்கள்  இருவரையும் அவர்கள் முட்டிபோட வைத்து சரமாரியாக தாக்கி உள்ளனர்.

இது தொடர்பாக பாதிக்கப்பட்ட இருவரும் பொலிஸில் அளித்த முறைப்பாட்டின் பேரில் வளசரவாக்கம் பொலிஸார் மனோவின் மகன்களான ரபீக், சாகீர் மற்றும் அவரது நண்பர்கள் என 5 பேர் மீது ஆபாசமாக பேசுதல், தாக்குதல், கொலை மிரட்டல் உள்ளிட்ட 3 பிரிவுகளின் கீழ் வழக்குப்பதிவு செய்துள்ளனர். இதில்  2 பேரை கைது செய்துள்ள பொலிஸார், தலைமறைவாக உள்ள மனோவின் 2 மகன்கள் உட்பட 3 பேரை தீவிரமாக தேடி வருகின்றனர்.

இந்நிலையில் தலைமறைவாக உள்ள பாடகர் மனோவின் மகன்களை பிடிக்க வளசரவாக்கம் பொலிஸ் உதவி ஆய்வாளர் ரவிச்சந்திரன் தலைமையிலான 5 பேர் கொண்ட தனிப்படை ஈசிஆர் விரைந்துள்ளது. செல்போன் சிக்னலை வைத்து மனோவின் மகன்களை பிடிக்க பொலிஸார் ஈசிஆர் விரைந்துள்ளனர்.