தவறவிடாதீர்கள்..!உடனே பதிவு செய்யுங்கள்

சுப்பர் ஸ்டார் ரஜினிகாந்த் நடிப்பில் தயாராகி வரும் 'வேட்டையன்' எனும் திரைப்படத்தில் இடம் பெற்ற 'மனசிலாயோ ' எனும் முதல் பாடலும், பாடலுக்கான லிரிக்கல் வீடியோவும் வெளியிடப்பட்டிருக்கிறது.

இயக்குநர் த. செ. ஞானவேல் இயக்கத்தின் உருவாகி இருக்கும் 'வேட்டையன்' எனும் திரைப்படத்தில் சுப்பர் ஸ்டார் ரஜினிகாந்த், பொலிவுட் மெகா ஸ்டார் அமிதாப்பச்சன், பகத் ஃபாஸில், ராணா டகுபதி, மஞ்சு வாரியர், ரித்திகா சிங், துஷாரா விஜயன், அபிராமி, ரோகிணி உள்ளிட்ட பலர் நடித்திருக்கிறார்கள்.

எஸ். ஆர். கதிர் ஒளிப்பதிவு செய்திருக்கும் இந்த திரைப்படத்திற்கு அனிருத் ரவிச்சந்தர் இசையமைத்திருக்கிறார்.

எக்சன் என்டர்டெய்னர் ஜேனரில் தயாராகி இருக்கும் இந்த திரைப்படத்தை லைக்கா புரொடக்ஷன்ஸ் நிறுவனம் சார்பில் தயாரிப்பாளர் சுபாஷ்கரன் பிரம்மாண்டமான பொருட்செலவில் பான் இந்திய திரைப்படமாக தயாரித்திருக்கிறார்.

எதிர்வரும் ஒக்டோபர் மாதம் பத்தாம் திகதியன்று உலகம் முழுவதும் தமிழ், தெலுங்கு, கன்னடம், இந்தி ஆகிய மொழிகளில் பட மாளிகைகளில் வெளியாகும் இந்த திரைப்படத்தில் இடம்பெற்ற 'சேச்சி வந்தில்ல தெறிக்கவிட்டான்...' எனத் தொடங்கும் முதல் பாடலும், பாடலுக்கான லிரிக்கல் வீடியோவும் வெளியிடப்பட்டிருக்கிறது.

இந்த பாடலை பாடலாசிரியர்கள் சுப்பர் சுப்பு மற்றும் விஷ்ணு எடவன் ஆகியோர் இணைந்து எழுதி இருக்க,  மறைந்த பின்னணி பாடகர் மலேசியா வாசுதேவன்- யுகேந்திரன் வாசுதேவன்- அனிருத் ரவிச்சந்தர் மற்றும் பின்னணி பாடகி தீப்தி சுரேஷ் ஆகியோர் இணைந்து பாடியிருக்கிறார்கள்.

துள்ளலிசை பாணியில் அமைந்த இந்த பாடல் இளைய தலைமுறை ரசிகர்களை வெகுவாக கவர்ந்து வருகிறது. 

இந்தப் பாடலில் மறைந்த பின்னணி பாடகரும், நடிகருமான மலேசியா வாசுதேவனின் குரல் செயற்கை நுண்ணறிவு தொழில்நுட்பத்தின் மூலம் பயன்படுத்தப்பட்டிருக்கிறது.‌

இதனைத் தொடர்ந்து செயற்கை நுண்ணறிவு தொழில்நுட்பத்தின் மூலம் மீண்டும் பயன்படுத்தப்பட்ட பிரபல பின்னணி பாடகர்களின் பட்டியலில் பாம்பே பாக்யா , சாகுல் ஹமீது, பவதாரிணி ஆகியோரைத் தொடர்ந்து மலேசியா வாசுதேவன் குரலும் இடம் பிடித்திருக்கிறது. 

மேலும் மறைந்த 'பாடும் நிலா' எஸ் பி பாலசுப்ரமணியத்தின் குரலும் இந்த படத்தில் பயன்படுத்தப்பட்டிருப்பதாகவும் அந்த பாடலும் விரைவில் வெளியாகும் என்றும் எதிர்பார்க்கப்படுகிறது.