தவறவிடாதீர்கள்..!உடனே பதிவு செய்யுங்கள்

சுப்பர் ஸ்டார் ரஜினிகாந்த் நடிப்பில் தயாராகி வரும் 'கூலி' படத்தில் நடிக்கும் நடிகர்கள் ஏற்றிருக்கும் கதாபாத்திரத்தின் தோற்ற புகைப்படத்தை படக்குழுவினர் வெளியிடத் தொடங்கி இருக்கிறார்கள்.

தமிழ் திரையுலகின் முன்னணி நட்சத்திர இயக்குநரான லோகேஷ் கனகராஜ் இயக்கத்தில் தயாராகி வரும் 'கூலி' எனும் திரைப்படத்தில் சுப்பர் ஸ்டார் ரஜினிகாந்த், உபேந்திரா, சத்யராஜ், ஸ்ருதிஹாசன், மகேந்திரன், ஷோபனா சௌபின் ஷாகிர் உள்ளிட்ட பலர் நடிக்கிறார்கள்.

கிரிஷ் கங்காதரன் ஒளிப்பதிவு செய்து வரும் இந்த திரைப்படத்திற்கு அனிருத் இசை அமைக்கிறார். எக்சன் என்டர்டெய்னராக தயாராகி வரும் இந்தத் திரைப்படத்தை சன் பிக்சர்ஸ் நிறுவனம் சார்பில் பிரபல தயாரிப்பாளர் கலாநிதி மாறன் தயாரிக்கிறார்.

இப்படத்தின் படப்பிடிப்பு தொடங்கி இருக்கும் தருணத்தில் படத்தில் நடிகர்கள் ஏற்றிருக்கும் கதாபாத்திரத்தின் பெயரும், அவர்களுடைய திரை தோற்ற புகைப்படமும் வெளியிடப்பட்டு வருகிறது. அந்த வகையில் நடிகர் சௌபின் ஷாகிர்- 'தயாள்' எனும் கதாபாத்திரத்தில் நடிக்கிறார் என படக் குழுவினர் பிரத்யேக புகைப்படத்தை வெளியிட்டு அறிவித்துள்ளனர்.

சுப்பர் ஸ்டார் ரஜினிகாந்த் நடிப்பில் தயாராகி எதிர்வரும் ஒக்டோபர் மாதம் பத்தாம் திகதியன்று வெளியாகவிருக்கும் 'வேட்டையன்' படத்தின் புதிய தகவல்கள் வெளியாகிக் கொண்டிருக்கும் இந்த தருணத்தில் சுப்பர் ஸ்டார் ரஜினிகாந்த் நடிப்பில் தயாராகும் 'கூலி' எனும் திரைப்படத்தின் தகவல்களும் வெளியாவதால் அவரது ரசிகர்கள் உற்சாகமடைந்திருக்கிறார்கள்.