தவறவிடாதீர்கள்..!உடனே பதிவு செய்யுங்கள்

(நெவில் அன்தனி)

பங்களதேஷுக்கு எதிராக ராவல்பிண்டி கிரிக்கெட் விளையாட்டரங்கில் இன்று புதன்கிழமை (21) ஆரம்பமான முதலாவது டெஸ்ட் கிரிக்கெட் போட்டியில் முதலில் துடுப்பெடுத்தாடிவரும் பாகிஸ்தான் முதலாம் நாள் ஆட்டநேர முடிவில் 4 விக்கெட்களை இழந்து 158 ஓட்டங்களைப் பெற்றிருந்தது.

இன்று காலை பெய்த மழை காரணமாக சுமார் நான்கரை மணித்தியாலங்கள் தாமதித்தே போட்டி தொடங்கியது.

அப் போட்டியில் முதலில் துடுப்பெடுத்தாட அழைக்கப்பட்ட பாகிஸ்தான் முதல் 3 விக்கெட்களை 16 ஓட்டங்களுக்கு இழந்து பெரும் தடுமாற்றத்தை எதிர்கொண்டது.

அப்துல்லா ஷபிக் (2), அணித் தலைவர் ஷான் மசூத் (6), முன்னாள் அணித் தலைவர் பாபர் அஸாம் (0) ஆகிய மூவரும் 9 ஓவர்களுக்குள் ஆட்டம் இழந்து வெளியேறினர்.

இந் நிலையில் ஜோடி சேர்ந்த சய்ம் அயூப், சவூத் ஷக்கீல் ஆகிய இருவரும் மிகவும் நிதானத்துடன் துடுப்பெடுத்தாடி 4ஆவது விக்கெட்டில் 98 ஓட்டங்களைப் பகிர்ந்து அணிக்கு சிறு நம்பிக்கையை ஊட்டினர்.

தனது இரண்டாவது டெஸ்ட் போட்டியில் விளையாடும் அயூப் மிகத் திறமையாகத் துடுப்பெடுத்தாடி கன்னிச் அரைச் சதத்தைப் பூர்ததிசெய்து 56 ஓட்டங்களுடன் ஆட்டம் இழந்தார்.

தொடர்ந்து சவூத் ஷக்கீல், மொஹம்மத் ரிஸ்வான் ஆகிய இருவரும் பிரிக்கப்படாத 5ஆவது விக்கெட்டில் 44 ஓட்டங்களைப் பகிர்ந்து பாகிஸ்தானை நல்ல நிலையில் இட்டனர்.

சவூத் ஷக்கில் 57 ஓட்டங்களுடனும் மொஹம்மத் ரிஸ்வான் 24 ஓட்டங்களுடனும் ஆட்டம் இழக்காதிருந்தனர்.

பந்துவீச்சில் ஷொரிபுல் இஸ்லாம் 30 ஓட்டங்களுக்கு 2 விக்கெட்களையும் ஹசன் மஹ்மூத் 33 ஓட்டங்களுக்கு 2 விக்கெட்களையும் கைப்பற்றினர்.