தவறவிடாதீர்கள்..!உடனே பதிவு செய்யுங்கள்

எதிர்வரும் ஜனாதிபதித் தேர்தலில் ஜனாதிபதி ரணில் விக்ரமசிங்கவின் வெற்றியை உறுதிப்படுத்த நிபந்தனையற்ற ஆதரவை வழங்குவதாக ஐக்கிய மக்கள் சக்தி கட்சியின் களுத்துறை மாவட்ட பாராளுமன்ற உறுப்பினர் வைத்தியர் ராஜித சேனாரத்ன தெரிவித்தார்.

ராஜித சேனாரத்ன செவ்வாய்க்கிழமை (13) ஹுனுப்பிட்டி கங்காராம விகாரையில் வைத்து உத்தியோகபூர்வ அறிவிப்பில் கையெழுத்திட்டு ஜனாதிபதிக்கு ஆதரவளிக்க இணைந்து கொண்டார்.

ஜனாதிபதி ரணில் விக்ரமசிங்க, இந்த நாட்டில் வறுமையை ஒழித்து மக்கள் மகிழ்ச்சியாக வாழக்கூடிய சூழலை உருவாக்கித் தந்துள்ளார் என ராஜித சேனாரத்ன சுட்டிக்காட்டினார். நாட்டைக் கட்டியெழுப்பும் ஜனாதிபதியின் செயற்திட்டம் சர்வதேச வரவேற்பைப் பெற்றுள்ளதாகவும் அவர் குறிப்பிட்டார்.

இடதுசாரி முகாமை பிரதிநிதித்துவப்படுத்தி தான் அரசியலில் பிரவேசித்ததாகவும், அரசியல் ரீதியாக முக்கிய முடிவுகளை எடுத்ததாகவும் தெரிவித்த அவர், அந்த தீர்மானங்கள் அனைத்தும் இந்நாட்டு மக்களுக்காக எடுக்கப்பட்டவை என்றும், சில சமயங்களில் தான் பொலிஸாரினால் தாக்கப்பட்டதாகவும் குறிப்பிட்டார்.

எதிர்கால சந்ததியினருக்காக பாதுகாப்பான நாட்டை கட்டியெழுப்ப தாம் தொடர்ந்தும் தன்னை அர்ப்பணிப்பதாகவும் எனவே ஜனாதிபதி ரணில் விக்ரமசிங்கவின் வெற்றியை  பெருவெற்றியாக்குவதற்கு மீண்டும் தாய்வீட்டுக்கு வந்து நிபந்தனையற்ற ஆதரவை வழங்குவதாகவும் அவர் தெரிவித்தார்.

இதன்போது கருத்துத் தெரிவித்த ஜனாதிபதி ரணில் விக்ரமசிங்க, இந்நாட்டு மக்களின் எதிர்பார்ப்புகளை நிறைவேற்றி நாட்டை முன்னோக்கி கொண்டு செல்வதற்கு புதிய பொருளாதார கட்டமைப்புடன் புதிய அரசியல் கட்டமைப்பையும் உருவாக்க வேண்டும். எனவே எதிர்வரும் ஜனாதிபதித் தேர்தலில் சுயேட்சை வேட்பாளராக போட்டியிட தீர்மானித்துள்ளதாக தெரிவித்த ஜனாதிபதி, சமூகத்தை மாற்றியமைக்க வேண்டும் என்று தன்னைப் போலவே  தீவிர சிந்தனை கொண்ட பாராளுமன்ற உறுப்பினரான ராஜித சேனாரத்ன தன்னுடன் இணைந்து கொள்வதில் மகிழ்ச்சியடைவதாகவும் தெரிவித்தார்.

நாரஹேன்பிட்டி அபயாராம விகாராதிபதி வணக்கத்திற்குரிய முரத்தெட்டுவே ஆனந்த தேரர் உள்ளிட்ட மகாசங்கத்தினர், அமைச்சர் மஹிந்த அமரவீர, பாராளுமன்ற உறுப்பினர் வஜிர அபேவர்தன,   தேசிய பாதுகாப்பு தொடர்பான ஜனாதிபதியின் சிரேஷ்ட ஆலோசகரும் ஜனாதிபதி பணிக்குழாம் பிரதானியுமான சாகல ரத்நாயக்க, முன்னாள் அமைச்சர்களான மனுஷ நாணாயக்கார, ரவி கருணாநாயக்க  , முன்னாள் பாராளுமன்ற உறுப்பினர் சதுர சேனாரத்ன உள்ளிட்ட அரசியல் பிரதிநிதிகள் குழுவினரும் இந்நிகழ்வில் கலந்துகொண்டனர்.

இதேவேளை, ஸ்ரீலங்கா பொதுஜன பெரமுன  புத்தளம் மாவட்ட பாராளுமன்ற உறுப்பினர்  ஜகத் பிரியங்கரவும் ஜனாதிபதி ரணில் விக்ரமசிங்கவின் வெற்றியை உறுதிப்படுத்துவதற்காக இன்று (13) இணைந்தார்.

ஜனாதிபதியினால் ஆரம்பிக்கப்பட்டுள்ள பொருளாதார மற்றும் அரசியல் வேலைத்திட்டத்தின் ஊடாகவே இந்த நாட்டை முன்னோக்கி கொண்டு செல்ல முடியும் என்று சுட்டிக்காட்டிய அவர், நாட்டின் நலனுக்காக அந்த வேலைத்திட்டத்திற்கு தனது பூரண ஆதரவை வழங்குவதாகவும் தெரிவித்தார்.