தவறவிடாதீர்கள்..!உடனே பதிவு செய்யுங்கள்

இராமபிரானால் வழிபட்ட பெருமை கொண்ட மட்டக்களப்பு ஸ்ரீ மாமாங்கேஸ்வரர் ஆலயத்தின் ஆடி அமாவாசை தீர்த்தோற்சவம் இன்று (04) நண்பகல் பல்லாயிரக்கணக்கான அடியார்கள் புடைசூழ நடைபெற்றது.

மூர்த்தி, தலம், தீர்த்தம் ஆகியவற்றினை ஒருங்கே கொண்ட இந்த ஆலயத்தின் மஹோற்சவமானது கடந்த வெள்ளிக்கிழமை (02) கொடியேற்றத்துடன் ஆரம்பமானது.

இலங்கையில் மிகவும் உயரமான திராவிட முகப்புத்திர சிற்ப மகாரதம் கொண்ட ஆலயமாகவும் சிறப்பு பெற்ற இந்த ஆலயத்தின் இரத பவனி நேற்று (03) நடைபெற்றது.

மாமாங்கேஸ்வரர் ஆலயத்தின் பிரதம குரு சிவாகம கலாநிதி சிவஸ்ரீ கமலராஜ குருக்கள் தலைமையில் உற்சவ கிரியைகள் நடத்தப்பட்டு வரும் நிலையில், இன்று காலை விநாயகர் மற்றும் கொடித்தம்பத்துக்கு விசேட பூஜைகளை தொடர்ந்து திருப்பொற்சுண்ணம் இடிக்கும் நிகழ்வும் நடைபெற்றது.

அதனை தொடர்ந்து வசந்த மண்டபத்தில் விசேட பூஜைகள், சுவாமி வீதியுலா நடைபெற்றது.

அதனையடுத்து, வெளிவீதியில் எருது வாகனத்தில் தீர்த்தக்கரையில் எழுந்தருளி அங்கு சிறப்பு பூஜைகள் நடைபெற்றன.

தொடர்ந்து, பிரமகர்த்தி தோஷம் நீங்கப்பெற்ற ஆலயம் என்ற சிறப்பினை கொண்ட ஆலயத்தின் ஆடி அமாவாசை தீர்த்தோற்சவத்தில் பல்லாயிரக்கணக்கான அடியார்கள் கலந்துகொண்டனர்.

இதன்போது தந்தையை இழந்தவர்கள் தர்ப்பணம் விட்டு பிதிர்க்கடன் செலுத்தினர்.