தவறவிடாதீர்கள்..!உடனே பதிவு செய்யுங்கள்

தமிழ் திரையுலகில் நம்பிக்கை தரும் நட்சத்திரமாக வளர்ந்து வரும் நடிகர் துருவ் விக்ரம் கதையின் நாயகனாக நடித்து வரும் 'பைசன் காளமாடன்' எனும் திரைப்படத்தின் முதற்கட்ட படப்பிடிப்பு நிறைவடைந்ததாக பட குழுவினர் பிரத்யேக புகைப்படங்களை வெளியிட்டு தெரிவித்திருக்கிறார்கள்.

'பரியேறும் பெருமாள்', 'கர்ணன்', 'மாமன்னன்' ஆகிய திரைப்படங்களை இயக்கி தனித்துவமான படைப்பாளி என்ற முத்திரையை பதித்திருக்கும் இயக்குநர் மாரி செல்வராஜ் இயக்கத்தில் உருவாகி வரும் 'பைசன்- காளமாடன்' எனும் திரைப்படத்தில் துருவ் விக்ரம், அனுபமா பரமேஸ்வரன், லால், பசுபதி, ரஜிஷா விஜயன், ஹரி கிருஷ்ணன், அழகம்பெருமாள், 'அருவி' மதன், கலையரசன் உள்ளிட்ட பலர் நடிக்கிறார்கள். கே. எழில் அரசு ஒளிப்பதிவு செய்து வரும் இந்தத் திரைப்படத்திற்கு நிவாஸ் கே. பிரசன்னா இசையமைக்கிறார். கபடி விளையாடும் வீரரின் வாழ்வியலை மையப்படுத்தி தயாராகும் இந்த திரைப்படத்தை அப்ளாஸ் என்டர்டெய்ன்மென்ட் மற்றும் நீலம் ஸ்டுடியோஸ் ஆகிய நிறுவனங்கள் இணைந்து தயாரிக்கிறது.

ஒடுக்கப்பட்ட மக்களின் பலவீனப்படுத்தப்பட்ட குரலை.. ஆதிக்கம் செலுத்தும் வகையில்  டிஜிட்டல் செல்லுலாய்ட் திரையில் செதுக்கும் படைப்பாளியான மாரி செல்வராஜ்- தொடர் வெற்றிகளை பதிவு செய்து வருவதால்... அவரின் இயக்கத்தில் உருவாகும் இந்தத் திரைப்படத்திற்கும் ரசிகர்களிடையேயும், திரையுலக வணிகர்களிடையேயும் பெரும் எதிர்பார்ப்பு ஏற்பட்டிருக்கிறது.