தவறவிடாதீர்கள்..!உடனே பதிவு செய்யுங்கள்

காலி, ரத்கம பிரதேசத்தில் திருடப்பட்ட 11 இலட்சம் ரூபா பெறுமதியான முச்சக்கரவண்டி ஒன்றை ஒரு இலட்சத்து 75 ஆயிரம் ரூபாவுக்கு கொள்வனவு செய்ததாகக் கூறப்படும் பொலிஸ் உத்தியோகத்தர் ஒருவர் ரத்கம பொலிஸாரால் நேற்று திங்கட்கிழமை (17) கைது செய்யப்பட்டுள்ளார்.

பொலிஸ் விசேட அதிரடிப்படை பிரிவில் கடமையாற்றும் பொலிஸ் உத்தியோகத்தரொருவரே கைது செய்யப்பட்டுள்ளார்.

இந்த முச்சக்கரவண்டியானது ரத்கம , கம்மெத்தகொட பிரதேசத்தில் கடந்த 16 ஆம் திகதி வீதியில் நிறுத்தி வைக்கப்பட்டிருந்த போது இனந்தெரியாத சிலரால் திருடப்பட்டுள்ளதாக பொலிஸார் தெரிவித்தனர்.

இது தொடர்பில் பொலிஸாருக்கு கிடைத்த தகவலின் பேரில் மேற்கொள்ளப்பட்ட சோதனையில் சந்தேக நபரான பொலிஸ் உத்தியோகத்தர் முச்சக்கரவண்டியுடன் கைது செய்யப்பட்டுள்ளார்.

சந்தேக நபரான பொலிஸ் உத்தியோகத்தர் முகநூலில் வெளியிடப்பட்ட விளம்பரம் ஒன்றின் ஊடாக இந்த முச்சக்கரவண்டியை கொள்வனவு செய்துள்ளதாக பொலிஸ் விசாரணையில் தெரியவந்துள்ளது.

இது தொடர்பான மேலதிக விசாரணைகளை ரத்கம பொலிஸார் மேற்கொண்டு வருகின்றனர்.