தவறவிடாதீர்கள்..!உடனே பதிவு செய்யுங்கள்

யாழ்ப்பாணம் கோப்பாய் ஆசிரியர் கலாசாலையில் திருவள்ளுவர் குருபூசை தினம் இன்று திங்கட்கிழமை (26) அனுட்டிக்கப்பட்டது. 

கலாசாலையின் அதிபர் சந்திரமௌலீசன் லலீசன் தலைமையில் இடம்பெற்ற இந்நிகழ்வில் கலாசாலையின் முன்றிலில் உள்ள திருவள்ளுவர் சிலைக்கு மலர் மாலை அணிவிக்கப்பட்டதுடன், மலர் வணக்கமும் செலுத்தப்பட்டது. விரிவுரையாளர்களும் ஆசிரிய மாணவர்களும் மலர் வழிபாடு மேற்கொண்டனர். 

திருவள்ளுவர் குறித்தும் திருக்குறள் குறித்தும் ஆசிரிய மாணவர்களின் சிற்றுரைகள் இடம்பெற்றன. உரைகளை ஆற்றிய ஆசிரிய மாணவர்களுக்கு புத்தக பரிசில்கள் வழங்கி மதிப்பளிக்கப்பட்டது. இப்பரிசில்களை கலாசாலையின் மூத்த விரிவுரையாளர் மு.ஜெயக்குமாரி வழங்கினார். 

திருவள்ளுவர் குருபூசை மாசி மாத உத்திர நட்சத்திர நாளில் அனுஷ்டிக்கப்படுவது வழக்கமாகும். திருவள்ளுவர் வைகாசி மாத அனுஷ நட்சத்திரத்தில் பிறந்து மாசி மாத உத்தர நட்சத்திரத்தில் பூரணமடைந்தார் என்பது தமிழ் அறிஞர்களின் நம்பிக்கையாகும். திரு வி.க., தமிழ்த் தாத்தா உ.வே.சாமிநாதையர் போன்றோர் இக்கருத்தை வழிமொழிந்துள்ளனர். 

கோப்பாய் ஆசிரியர் கலாசாலையின் செயற்பாடுகள் திருவள்ளுவரின் கடவுள் வாழ்த்துப் பாடலுடன் தினமும் ஆரம்பிக்கப்படுவது பன்னெடுங்காலமாக வழக்கமாக உள்ளது.