தவறவிடாதீர்கள்..!உடனே பதிவு செய்யுங்கள்

(எம்.ஆர்.எம்.வசீம், இராஜதுரை ஹஷான்)

2024 ஆம் ஆண்டு வரவு செலவுத் திட்டத்தில் நிவாரணம் வழங்கப்படவில்லை என்று குற்றஞ்சாட்டப்படுகிறது.நிதி இல்லாமல் எவ்வாறு நிவாரணம் வழங்குவது.சர்வதேச நாணய நிதியம் ஏற்றுக்கொள்ளும் வகையில் வரவு செலவுத் திட்டம் தயாரிக்கப்பட்டுள்ளது என ஆளும் தரப்பின் பாராளுமன்ற உறுப்பினர்  காமினி லொகுகே தெரிவித்தார்.

பாராளுமன்றத்தில் வியாழக்கிழமை (16) இடம்பெற்ற 2024 ஆம் ஆண்டுக்கான வரவு செலவுத் திட்டத்தின் இரண்டாம் வாசிப்பு மீதான விவாதத்தில் உரையாற்றுகையில் மேற்கண்டவாறு குறிப்பிட்டார்.

அவர் மேலும் உரையாற்றியதாவது,

நாட்டின் தற்போதைய நிலைமையை சகலரும் விளங்கிக் கொள்ள வேண்டும்.கடுமையான  பொருளாதார பாதிப்புக்கு மத்தியில் 2024 ஆம் ஆண்டுக்கான வரவு செலவுத் திட்டத்தை சமர்ப்பித்துள்ளார்.பொருளாதார பாதிப்பில் இருந்து மீட்சியடைய வேண்டுமாயின் கசப்பான மருந்தை அனைவரும் பருக வேண்டும்.

வரவு செலவுத் திட்டத்தின் ஊடாக எவருக்கும் நிவாரணம் வழங்கப்படவில்லை என எதிர்க்கட்சியினர் குற்றஞ்சாட்டுகிறார்கள்.நிதி இல்லாமல் எவ்வாறு நிவாரணம் வழங்குவது. 2023 ஆம் ஆண்டுக்கான வரவு செலவுத் திட்டத்தில் எதிர்பார்க்கப்பட்ட அரச வருமானத்தை பெற்றுக்கொள்ள முடியாத நிலையில் சகலருக்கும் நிவாரணம் வழங்குவது சாத்தியமற்றது.

பொருளாதார பாதிப்புக்கு மத்தியில் ஜனாதிபதியால் முன்வைக்கப்பட்ட வரவு  செலவுத் திட்டத்தின் முன்மொழிவுகள் சிறந்தவையாக காணப்படுகின்றன.சர்வதேச நாணய நிதியம் ஏற்றுக்கொள்ள கூடிய வகையில் தான் வரவு செலவுத் திட்டம் சமர்ப்பிக்கப்பட்டுள்ளது.

பொருளாதார நெருக்கடியில் இருந்து மீள்வதற்கு சகல தரப்பினரது ஒத்துழைப்பும் அவசியம் என்பதை தொடர்ந்து வலியுறுத்துகிறோம். பொருளாதார மீட்சிக்காக ஜனாதிபதி ரணில் விக்கிரமசிங்கவுக்கு அரசியலுக்கு அப்பாற்பட்ட வகையில் ஒத்துழைப்பு வழங்குகிறோம் என்றார்.