தவறவிடாதீர்கள்..!உடனே பதிவு செய்யுங்கள்

தென்னிந்திய திரையுலகில் முன்னணி நட்சத்திர நடிகையாக வலம் வரும் நடிகை திரிஷா கதையின் நாயகியாக முதன்மையான வேடத்தில் நடித்திருக்கும் 'தி ரோடு' எனும் திரைப்படத்தின் முன்னோட்டம் வெளியிடப்பட்டிருக்கிறது.

வெளியான குறுகிய கால அவகாசத்திற்குள் ஒரு மில்லியனுக்கும் மேற்பட்ட பார்வையாளர்களால் பார்வையிடப்பட்டு சாதனை படைத்திருக்கிறது.

அறிமுக இயக்குநர் அருண் வசீகரன் இயக்கத்தில் தயாராகி இருக்கும் முதல் திரைப்படம் 'தி ரோடு'. இதில் திரிஷா, ஷபீர், சந்தோஷ் பிரதாப், மியா ஜார்ஜ், எம். எஸ். பாஸ்கர், விவேக் பிரசன்னா, வேல.ராமமூர்த்தி, லட்சுமி பிரியா, சூப்பர் குட் சுப்பிரமணி உள்ளிட்ட பலர் நடித்திருக்கிறார்கள்.

கே. ஜி. வெங்கடேஷ் ஒளிப்பதிவு செய்திருக்கும் இந்த திரைப்படத்திற்கு சாம்  சி. எஸ். இசையமைத்திருக்கிறார். திரில்லர் ஜேனரில் அமைந்திருக்கும் இந்த திரைப்படத்தை ஏஏஏ சினிமா பிரைவேட் லிமிடெட் எனும் நிறுவனம் தயாரித்துள்ளது.

எதிர்வரும் ஒக்டோபர் மாதம் ஆறாம் திகதியன்று உலகம் முழுவதும் பட மாளிகைகளில் வெளியாகவிருக்கும் இந்த திரைப்படத்தின் முன்னோட்டம் வெளியிடப்பட்டிருக்கிறது.

'காதலிப்பதிலும் பழிவாங்குவதிலும் ஆணை விட பெண் காட்டுமிராண்டித்தனமானவள்' என்ற அறிமுக மேற்கோளுடன் தொடங்கும் இப்படத்தின் முன்னோட்டம் ரசிகர்களை வெகுவாக கவர்ந்திருக்கிறது.

அதிலும் முன்னோட்டத்தில் நானூறு கிலோ மீற்றருக்கு அப்பால் சென்று ஒரு பெண் பழிவாங்குவது போல் காட்சிகள் அமைக்கப்பட்டிருப்பதால் படத்தைப் பற்றிய எதிர்பார்ப்பையும் அதிகரித்திருக்கிறது. மேலும் இந்தத் திரைப்படம் உண்மை சம்பவத்தை தழுவி உருவாகி இருப்பதால் கூடுதல் கவனத்தையும் கவர்ந்திருக்கிறது.