தவறவிடாதீர்கள்..!உடனே பதிவு செய்யுங்கள்

பேலியகொடை மெனிங் சந்தையில் இம்மாதம் முதல் புதிய நிறுவனமொன்றின் மூலம் குப்பைகளை அகற்றுவதற்கு தீர்மானிக்கப்பட்டுள்ளதாக நகர அபிவிருத்தி அதிகார சபையின் பிரதிப் பணிப்பாளர் நாயகம் (சொத்து மற்றும் காணி அபிவிருத்தி) ஈ.ஏ.சி. பிரியஷாந்த தெரிவித்தார்.

தற்போது குப்பைகளை அகற்றும் நிறுவனத்தின் திறமையின்மையால் பல பிரச்சினைகள் எழுந்துள்ளதாக அவர் குறிப்பிடுகின்றார்.

இந்த சந்தையை சுத்தமாக வைத்திருக்க வர்த்தக சங்கங்களின் ஆதரவை எதிர்பார்ப்பதாக அவர் மேலும் தெரிவித்தார்.

பேலியகொடை மெனிங் சந்தையில் எழுந்துள்ள பிரச்சினைகளைத் தீர்க்கு முகமாக நகர அபிவிருத்தி அதிகார சபையினால் இதுவரை செயற்படுத்தியுள்ள செய்கைகள் தொடர்பில் நகர அபிவிருத்தி அதிகார சபையின் பிரதிப் பணிப்பாளர் நாயகம் (சொத்து மற்றும் காணி அபிவிருத்தி), இ.ஏ.சி. திரு.பிரியஷாந்த வியாழக்கிழமை (7) தெரிவித்தார்.

அவர் மேலும் கூறியதாவது:

கொழும்பு மெனிங் சந்தையானது கொழும்பில் இருந்து பேலியகொடைக்கு ஒரு திட்டத்தின் படி கொண்டுவரப்பட்டது. இது கொழும்பில் இருந்தபோது பாரிய வாகன நெரிசல் ஏற்பட்டது. கொழும்பு வணிக நகரமாக வளர்ந்த போது, அங்கு இந்த சந்தையை பராமரிப்பது கடினமாக இருந்தது.

கொழும்பில் அது எந்த ஒழுங்கிலும் இல்லை. அந்த இடத்திற்கு வரும் மொத்த வியாபாரிகள் மற்றும் பொதுமக்கள் வாகனங்களை நிறுத்த முடியாத நிலை உள்ளது. எனவே, அபிவிருத்தித் திட்டத்தின் படி, கொழும்பில் சுமார் 5 ஏக்கர் நிலப்பரப்பில் இருந்த மெனிங் சந்தையை, 13 ஏக்கர் பரப்பளவில் பேலியகொடைக்கு நகர அபிவிருத்தி அதிகார சபை கொண்டு வந்தது.

பேலியகொடைக்கு கொண்டு வந்த பின்னர், எந்தவொரு வியாபாரியும் நெடுஞ்சாலைகள் ஊடாக இந்த இடத்தை அடைய முடியும். சந்தை இடப்பெயர்ந்தால் பல்வேறு பிரச்சினைகள் ஏற்பட முடியும். சந்தையை கொண்டு வருவதால் மொத்த வியாபாரத்திற்கு எந்த பிரச்சினையும் ஏற்படவில்லை.

வாகனங்களை நிறுத்தி வைக்க முடியும். ஆனால், பயணிகள் போக்குவரத்து பஸ்கள் அவ்வழியாக இல்லாததால், சில்லரை வியாபாரத்தில் பொதுமக்களுக்கு போக்குவரத்து சிக்கல்கள் உள்ளன. இந்த வழித்தடத்தில் பஸ்களை இயக்குவது தொடர்பாக இலங்கை போக்குவரத்து சபை மற்றும் வீதிப் பயணிகள் போக்குவரத்து அதிகார சபையிடம் பலமுறை பேசியுள்ளோம். ஆனால் அது தோல்வியடைந்தது. அந்த வீதிகளில் போதிய ஆட்கள்  பஸ்களில் ஏறாததால் போக்குவரத்து துறைக்கு பிடிக்கவில்லை, ஆனாலும் அதற்கான முயற்சியில் ஈடுபட்டு வருகிறோம்.

இங்குள்ள மற்றொரு பிரச்சினை குப்பை மற்றும் கழிவறை பிரச்சினை. நாங்கள் இதைத் திட்டமிடும்போது எதிர்பார்த்ததை விட அதிகமான மக்கள் இந்த இடத்திற்கு வருகிறார்கள். இதனால், தற்போதுள்ள கழிப்பறைகள் சில நேரங்களில் நிரம்பி வழிகின்றன. முடிந்தவரை அதனை நிர்வகிக்கும் பணியில் ஈடுபட்டுள்ளோம்.

ஓராண்டுக்கு முன், டெண்டர் முறைப்படி, தனியாரிடம் கொடுத்து, இந்த கழிப்பறை அமைப்பை அப்புறப்படுத்த முயற்சித்தோம். ஆனால் மெனிங் வர்த்தக தொழிற்சங்கங்கள் இதற்கு எதிர்ப்பு தெரிவித்தன. இதை நாம் மட்டும் செய்வது கடினம். வணிக சங்கங்களின் ஆதரவும் எங்களுக்குத் தேவை. இதற்கான தீர்வுகளை வழங்குவதற்கு துரிதமாக செயற்பட்டு வருகின்றோம்.

இங்கு உணவகம் மற்றும் குப்பை கிடங்கு ஆகியவை அருகருகே அமைந்துள்ளன. எனவே, குப்பை அள்ளும் இடத்தை வேறு இடத்துக்கு மாற்ற ஏற்பாடு செய்யப்பட்டு வருகிறது. சுமார் 7 முதல் 8 தொன் குப்பைகள் சேகரிக்கப்பட்டால் மட்டுமே குப்பைகள் அகற்றப்படுகின்றன.

சில நேரங்களில் குப்பை அகற்றும் பணி அந்தந்த நிறுவனத்தால் மாலையில் செய்யப்படுகிறது. குப்பையை அகற்ற டெண்டர் எடுத்த நிறுவனத்தின் திறமையின்மையும் இதில் பாதிப்பை ஏற்படுத்தியுள்ளது. நாங்கள் புதிய டெண்டர் அழைப்பு மற்றும் புதிய நிறுவனத்தைத் தேர்வு செய்கிறோம். இந்த மாதத்துக்குள் வேறு நிறுவனத்துக்கு வழங்கப்படும். அதன் மூலம், இந்தப் பிரச்சினைக்கு தீர்வு காண முடியும். நகர அபிவிருத்தி அதிகார சபை என்ற வகையில் பேலியகொடை மெனிங் சந்தையை வெற்றிகரமாக பேணுவதற்கு எங்களால் இயன்றதை தொடர்ந்து செய்வோம்.