இன, மதவாத செயற்பாடுகளுக்கு மக்கள் துணைபோகக் கூடாது

Published By: Vishnu

27 Aug, 2023 | 04:55 PM

நாட்டில் மக்கள் மத்தியில் இன, மதவாதத்தை தூண்டி அரசியல் குளிர்காயும் நடவடிக்கை தற்போது தீவிரமடைந்து வருகின்றது. இவ்வாறு இனவாதத்தையும் மதவாதத்தையும் கிளப்பி அரசியல் செய்யும் தெற்கிலுள்ள சிங்கள இனவாத சக்தியினரின் செயற்பாடானது மீண்டும் அரங்கேறி வருகின்றது.

வடக்கு, கிழக்கில் சிங்கள பெளத்த தேசியவாதத்தை பரப்பும் வகையில் தமிழ் மக்களின் காணிகளை சுவீகரிக்கும் செயற்பாடுகள் இடம்பெற்று வருகின்றன. தொல்பொருள் முக்கியத்துவம்வாய்ந்த இடங்கள் என்ற பேரில் இத்தகைய செயற்பாடுகள் இடம்பெறுகின்றன. முல்லைத்தீவு குருந்தூர்மலை விவகாரத்தை வைத்து அரசியல் செய்வதற்கு தெற்கின் இனவாத சக்தியினர் முயன்று வருகின்றனர். குருந்தூர்மலையில் கடந்த மாதம் இடம்பெற்ற பொங்கல் நிகழ்வுக்கு எதிராக பெளத்த சிங்கள பேரினவாத சக்தியினர் பெரும் பிரசாரத்தை மேற்கொண்டிருந்தனர். ஆனால் அதனையும் மீறி நீதிமன்ற உத்தரவுக்கமைய அங்கு பொங்கல் நிகழ்வு இடம்பெற்றிருந்தது.

இந்தப் பொங்கல் நிகழ்வினைத் தடுப்பதற்கு பிவிதுரு ஹெலஉறுமயவின் தலைவர் உதய கம்மன்பில ,பொதுஜன பெரமுனவின் பாராளுமன்ற உறுப்பினர் அட்மிரல் சரத்வீரசேகர உட்பட்டோர் பெரும் முனைப்பு காட்டியிருந்தனர். சிங்கள பெளத்த மக்களை தூண்டிவிடும் வகையில் இவர்களது செயற்பாடுகள் இடம்பெற்றிருந்தன.

பெளத்த தேரர்களைக் கொண்ட அமைப்புக்களும் இந்த குருந்தூர்மலை விவகாரத்தில் தலையீடுகளை மேற்கொண்டு முரண்பாடுகளை தோற்றுவிக்க முயன்றிருந்தன. இவ்வாறு வடக்கு, கிழக்கைப் பொறுத்தவரையில் பெளத்த சிங்கள பேரினவாத ஆக்கிரமிப்பை மேற்கொள்ளும் வகையிலான செயற்பாடுகள் முன்னெடுக்கப்படுகின்றன. இத்தகைய செயற்பாடுகளுக்கு தமிழ் அரசியல் கட்சிகளின் தலைவர்கள், சிவில் அமைப்புக்களின் பிரதிநிதிகள் கடும் எதிர்ப்புக்களை தெரிவித்து வருகின்றமையானது தெற்கின் சிங்கள இனவாத செயற்பாட்டாளர்களுக்கு பெரும் விசனத்தை ஏற்படுத்தும் விடயமாக மாறியிருக்கின்றது.

இதன் ஒரு கட்டமாக கொழும்பிலுள்ள வடக்கு, கிழக்கை சேர்ந்த பாராளுமன்ற உறுப்பினர்களின் இல்லங்களை முற்றுகையிட்டு போராட்டம் நடத்தவுள்ளதாக பிவிதுரு ஹெலஉறுமய கட்சியின் தலைவர் உதயகம்பன்பில அறிவித்திருக்கின்றார்.

இது குறித்து கொழும்பில் நடைபெற்ற செய்தியாளர் மாநாட்டில் கருத்து தெரிவித்த உதய கம்மன்பில, வடக்கு, கிழக்கு மாகாண தமிழ் அரசியல்வாதிகள் தெற்கில் சுதந்திரமாக வாழ்வதைப்போன்று சிங்களவர்கள் வடக்கு, மற்றும் கிழக்கில் சுதந்திரமாக வாழவேண்டும். சிங்களவர்களின் உரிமைகளை வென்றெடுப்பதற்காக கொழும்பிலுள்ள வடக்கு, கிழக்கு தமிழ் பாராளுமன்ற உறுப்பினர்களின் வீடுகள் முற்றுகையிடப்படும். இதன் முதற்கட்டமாக கொழும்பிலுள்ள பாராளுமன்ற உறுப்பினர் கஜேந்திரகுமார் பொன்னம்பலம் வீட்டின் முன்பாக இவ்வாரம் போரட்டத்தில் ஈடுபடுவோம். இந்த போராட்டத்தில் சிங்கள பெளத்தர்கள் ,இனவாத கொள்கையற்ற தமிழர்கள் அனைவரும் கலந்து கொள்ளவேண்டும் என்று அழைப்பு விடுத்துள்ளார்.

இதேபோன்றே குருந்தூர் மலை விவகாரத்தில் முல்லைதீவு நீதிமன்ற நீதிபதியின் செயற்பாடுகளுக்கு எதிர்ப்பு தெரிவித்து நீதிச்சேவை ஆணைக்குழுவிடம் விமல் வீரவன்ச தலைமையிலான தேசிய சுதந்திர முன்னணி முறைப்பாடு செய்துள்ளது. அந்த முன்னணியின் பாராளுமன்ற உறுப்பினர் ஜயந்த சமரவீர தலைமையில் கடந்த திங்கட்கிழமை இந்த முறைப்பாடு செய்யப்பட்டுள்ளது.

குருந்தூர்மலை விவகாரத்தில் நீதிபதி ஒருதலைப்பட்சமாகவும் பொறுப்பற்ற வகையிலும் செயற்பட்டுள்ளதாகவும் இந்த முறைப்பாட்டில் குற்றம்சாட்டப்பட்டிருக்கின்றது. இந்த வழக்கிலிருந்து அவரை நீக்கி மற்றொரு நீதிபதி முன்னிலையில் விசாரணை நடைபெறவேண்டுமென்றும் தேசிய சுதந்திர முன்னணி நீதிச்சேவை ஆணைக்குழுவிடம் கோரிக்கை விடுத்திருக்கின்றது.

குருந்தூர்மலை விவகாரத்தில் நீதிபதியின் செயற்பாட்டை கண்டித்து பாராளுமன்றத்தில் பொதுஜன பெரமுனவின் பாராளுமன்ற உறுப்பினர் அட்மிரல் சரத் வீரசேகர மூன்று தடவைகள் உரையாற்றியிருந்தார். குருந்தூர்மலையில் நீதிமன்ற உத்தரவை மீறி பெளத்த விகாரை கட்டப்படும் விடயம் தொடர்பில் நேரடியாக சென்று நீதிபதி விசாரணை நடத்தியிருந்தார். இதன்போது அங்கு சென்றிருந்த பாராளுமன்ற உறுப்பினர் சரத் வீரசேகர கருத்துக்கூற முற்பட்டபோது அதற்கு நீதிபதி அனுமதிக்கவில்லை.

அத்துடன் அங்கு வழிபாடுகளில் ஈடுபட்டபெளத்த பிக்குகளையும் வெளியேற்றுமாறு நீதிபதி உத்தரவிட்டிருந்தார். இதற்கு எதிராக பாராளுமன்றத்தில் கடும் விமர்சனங்களை சரத் வீரசேகர செய்திருந்தார். இதனைவிட கடந்த ஜூலை மாதம் 14ஆம் திகதி குருந்தூர்மலையில் ஆதிசிவன் ஐயனார் ஆலயம் இருந்த இடத்தில் பொங்கல் பொங்குவதற்கு அப்பகுதி மக்கள் நடவடிக்கை எடுத்திருந்தனர். இதற்கு தடை விதிக்குமாறு பொலிஸார் நீதிமன்றத்தில் மனுத்தாக்கல் செய்திருந்த போதிலும் அதற்கு தடை விதிக்க நீதிபதி மறுப்பு தெரிவித்திருந்தார். இந்த செயற்பாட்டுக்கு எதிராக இரண்டாவது தடவையாக பாராளுமன்றத்தில் சரத் வீரசேகர கருத்து கூறியிருந்தார். நீதிபதியின் செயற்பாடுகளை விமர்சிக்கும் வகையில் அவரது உரை அமைந்திருந்தது.

இதேபோன்றே கடந்த செவ்வாய்க் கிழமையும் சரத் வீரசேகர முல்லைத்தீவு நீதிபதியை ஒரு மனநோயாளி என்று விமர்சித்ததுடன் இவ்வாறானவரால் எவ்வாறு சரியான முறையில் செயற்பட முடியும் என்று கேள்வி எழுப்பியிருந்தார். அத்துடன் முல்லைத்தீவு நீதிமன்றத்துக்கு பிறிதொரு நீதிபதியை நியமிக்க வேண்டும் என்றும் பாராளுமன்றத்தில் கோரியிருந்தார்.

இவ்வாறு குருந்தூர் மலை விவகாரத்தை வைத்து அரசியல் குளிர்காயும் நடவடிக்கையில் சரத் வீரசேகர மற்றும் உதய கம்மன்பில போன்றவர்கள் ஈடுபட்டு வருகின்றனர். தெற்கில் சிங்கள மக்கள் மத்தியில் இனவாதத்தையும் மதவாதத்தையும் பரப்பி வருகின்றனர். குருந்தூர்மலை விவகாரத்தில் இத்தகைய இன, மதவாத செயற்பாடுகள் தூண்டிவிடப்படுகின்றமையானது இரு சமூகங்களுக்கு மத்தியிலும் முரண்பாடுகளை தோற்றுவிக்க செய்வதாகவே அமைகின்றது.

தெற்கிலிருந்து சிங்கள மக்களை பஸ்களில் ஏற்றிச்சென்று அவர்களை குருந்தூர்மலையில் இறக்கிவிட்டு முரண்பாடுகளை தோற்றுவிப்பதற்கு இத்தகைய சிங்கள இனவாத செயற்பாட்டாளர்கள் முனைந்து வருகின்றனர். அரசியல் சுயநலன்களுக்காக இத்தகைய இன, மதவாத செயற்பாடுகளை தூண்டிவிடுவதானது பெரும் இனக்கலவரங்களை உருவாக்குவதற்கு சாதகமான சூழலை ஏற்படுத்திவிடும்.

குருந்தூர்மலை விவகாரம் தொடர்பில் வடக்கு, கிழக்கு மாகாண பிரதம சங்க நாயக்கர் சியாம்பலா கஸ்வெவ விமலசார நாயக்க தேரர் தெரிவித்த கருத்தானது உண்மை நிலையை பறைசாற்றுவதாக அமைந்திருக்கின்றது. குருந்தூர்மலை விவகாரமானது தொல்பொருள் திணைக்களத்துக்கு உரியது. இதனை தனியொரு மதம் தனக்கானது என உரிமை கொண்டாடக் கூடாது. சிங்கள பெளத்தர்கள் இங்கு வாழ்ந்தார்கள் என்பது முரணானது. தமிழ் பெளத்தர்கள் இப்பகுதியில் வாழ்ந்துள்ளனர் என்பது உண்மையாகும் என்று அவர் தெரிவித்திருந்தார். அரசியலுக்காக பிதற்றிக்கொண்டிருப்பவர்களைப் பற்றி அலட்டிக்கொள்ளத் தேவையில்லை என்றும் அவர் சுட்டிக்காட்டியிருந்தார். நிலைமை இவ்வாறிருந்தபோதிலும் தெற்கில் இனவாதத்தை தூண்டும் செயற்பாடுகளே தொடர்ந்தும் இடம்பெற்று வருகின்றன.

நமது நாட்டைப் பொறுத்தவரையில் இனவாதத்தை தூண்டி தமது அரசியல் நலன்களை மேம்படுத்திக் கொள்வதற்காகவே அன்றுதொட்டு இன்றுவரை அரசியல் தரப்பினர் செயற்பட்டு வருகின்றனர். இத்தகைய இன, மதவாத செயற்பாடுகள் தவிர்க்கப்பட வேண்டுமென்று கோரிக்கைகள் விடுக்கப்பட்டு வருகின்ற போதிலும் சுயநல அரசியல் நலன்கருதி இத்தகைய இனவாத சக்தியினர் செயற்படுவது நாட்டுக்கு பாதகத்தையே ஏற்படுத்தி வருகின்றது.

கடந்த வருடம் முன்னாள் ஜனாதிபதி கோட்டாபய ராஜபக் ஷ தலைமையிலான அரசாங்கத்துக்கு எதிராக அரகலய போராட்டம் இடம்பெற்றிருந்தது.

இதன்போது சிங்கள, தமிழ், முஸ்லிம் மக்கள் ஒன்றிணைந்து பெரும் போராட்டத்தை நடத்தியிருந்தனர். இத்தகைய போராட்டத்தில் சகல இன மக்களும் பங்கேற்று இன,மதவாதத்துக்கு எதிராகவும் செயற்பட்டிருந்தனர். அரகலய போராட்டத்தை அடுத்து நாட்டில் இன, மதவாத செயற்பாடுகள் கட்டுப்படுத்தப்படும் என்ற எதிர்பார்ப்பு மேலோங்கியிருந்தது.

ஆனாலும் அந்த போராட்டம் முடிவுக்கு வந்ததையடுத்து மீண்டும் இன, மதவாதத்தை தூண்டிவிட்டு அரசியல் குளிர்காயும் செயற்பாடுகள் இடம்பெற்று வருகின்றன.

இத்தகைய இனவாத தரப்பினரின் பிரசாரங்களுக்கோ அல்லது தூண்டுதல்களுக்கோ சிங்கள மக்கள் எடுபடக்கூடாது. இவர்களின் சுயநல அரசியல் நோக்கங்களை மக்கள் புரிந்து கொள்ள வேண்டும் என்று வலியுறுத்த விரும்புகின்றோம்.