தவறவிடாதீர்கள்..!உடனே பதிவு செய்யுங்கள்

(நெவில் அன்தனி)

தாய்லாந்தின் பாங்கொங்கில் அமைந்துள்ள நிமிபுத்ர் உள்ளக விளையாட்டரங்கில் நடைபெற்றுவரும் 8 நாடுகளுக்கு இடையிலான FIBA மகளிர் ஆசிய கிண்ண கூடைப்பந்தாட்ட சுற்றுப் போட்டியில் இலங்கை கடைசி இடத்தைப் பெற்றது.

பி குழுவில் இடம்பெற்ற இலங்கை லீக் சுற்றில் கஸக்ஸ்தான் (34 - 66), ஜோர்தான் (41- 82), தாய்லாந்து (36 - 101) ஆகிய அணிகளிடம் தோல்வி அடைந்தது.

இதனை அடுத்து அணிகளை நிரல்படுத்தும் 7ஆம், 8ஆம் இடங்களைத் தீர்மானிக்கும் போட்டியில் மொங்கோலியாவை இன்று வியாழக்கிழமை (17) எதிர்த்தாடிய இலங்கை அப் போட்டியிலும் 41 - 80 என்ற புள்ளிகள் அடிப்படையில் தோல்வி அடைந்து கடைசி இடத்தை அடைந்தது.

இலங்கைக்கும் மொங்கோலியாவுக்கும் இடையிலான போட்டியின் முதலாவது ஆட்ட நேர பகுதியில் 17 - 7 என்ற புள்ளிகள் அடிப்படையில் மொங்கோலியா முன்னிலை அடைந்தது.

தொடர்ந்து 2ஆவது ஆட்ட நேர பகுதியிலும் திறமையாக விளையாடிய மொங்கோலியா அப் பகுதியையும் 23 - 14 என தனதாக்கி இடைவேளையின்போது 40 - 21 என்ற புள்ளிகள் வித்தியாசத்தில் முன்னிலையில் இருந்தது.

இடைவேளைக்குப் பின்னர் மிக வேகமாக விளையாடிய மொங்கோலியா 3ஆவது ஆட்ட நேர பகுதியில் 32 புள்ளிகளைக் குவித்ததுடன் இலங்கையினால் 11 புள்ளிகளையே பெற முடிந்தது.

கடைசி ஆட்ட நேர பகுதியை 9 - 8 என்ற புள்ளிகள் அடிப்படையில் இலங்கை தனதாக்கியபோதிலும் ஒட்டுமொத்த நிலையில் 80 - 41 என்ற புள்ளிகள் அடிப்படையில் மொங்கோலியா வெற்றிபெற்றது.