தவறவிடாதீர்கள்..!உடனே பதிவு செய்யுங்கள்

ஈழத்தமிழ் சினிமா கலைஞர்களை தொடர்ந்தும் ஆதரித்து வரும் குவியம் ஊடகம் இரண்டாவது தடவையாக ஏற்பாடு செய்திருந்த 'குவியம் விருதுகள் 2023' நிகழ்ச்சி கடந்த ஞாயிற்றுக்கிழமை 13ஆம் திகதி யாழ்ப்பாணத்தில் உள்ள தந்தை செல்வா கலையரங்கில் இடம்பெற்றது.

இவ்விருதுகளுக்கான விண்ணப்பங்கள் கடந்த மே மாதம் கோரப்பட்டிருந்தன. அவ்விண்ணப்பங்களின் அடிப்படையில், கடந்த 2022ஆம் ஆண்டு வெளிவந்த திரைப்படங்கள், குறும்படங்கள், காணொளிப் பாடல்கள் மற்றும் ஆவணப்படங்களில் இருந்து வெற்றியாளர்கள் தெரிவு செய்யப்பட்டு இந்நிகழ்வில் விருதுகள் வழங்கி கௌரவிக்கப்பட்டன. 

இளைஞர்களின் இதயம் வென்ற 'ரப் சிலோன்' குழுவினரின் கலக்கல் பாடல் மற்றும் 'காங் எக்ஸ்' குழுவினரின் அனல் பறக்கும் நடனம் என பல கலை நிகழ்ச்சிகளும் இதன்போது மேடையேற்றப்பட்டன.

அத்தோடு, காரை சிவநேசனின் இயக்கத்தில் விரைவில் வெளியாகவிருக்கும் 'புஷ்பக27' என்ற திரைப்படத்தின் ட்ரெய்லரும் நிகழ்வில் வெளியானது.

மேலும், ஈழத்தமிழ் சினிமாவுக்கான தனித்துவத்தையும் அடையாளத்தையும் வேண்டி ஓயாது பயணித்துக்கொண்டிருந்த வேட்கையாளன் அமரர் நவரட்ணம் கேசவராஜா இலங்கை சினிமாவுக்கு ஆற்றிய சேவைகளை நினைவுகூர்ந்து, அவரை கெளரவிக்கும் விதமாக 'வாழ்நாள் சாதனையாளர்' விருதும் வழங்கப்பட்டது. 

அந்த விருதினை அமரர் கேசவராஜா சார்பாக அவரது துணைவியார் மற்றும் மகன் ஆகியோர் பெற்றுக்கொண்டனர். அவரோடு மேலும் ஐந்து மூத்த சினிமா கலைஞர்களும் கௌரவிக்கப்பட்டனர்.

இந்நிகழ்வில் சினிமா கலைஞர்கள், சினிமா ஆர்வலர்கள், பொதுமக்கள் என பலரும் கலந்துகொண்டனர்.