தவறவிடாதீர்கள்..!உடனே பதிவு செய்யுங்கள்

(எம்.வை.எம்.சியாம்)

களுத்துறை, தொடங்கொடையிலுள்ள வீடொன்றில் இன்று திங்கட்கிழமை (14) அதிகாலை நபர் ஒருவர் கூரிய ஆயுதத்தால் தாக்கி கொலை செய்யப்பட்டுள்ளார்.

உயிரிழந்தவரின் வீட்டு திருத்தப்பணிகள் இடம்பெற்று வரும் நிலையில் மனைவி மற்றும் குழந்தையுடன் மனைவி வீட்டில் தங்கியிருந்த போதே அவர் தாக்குதலுக்கு இலக்காகி உயிரிழந்துள்ளதாக பொலிஸார் தெரிவித்தனர்.

இன்றைய தினம்  அதிகாலை 2.30 மணியளவில் வீட்டின் முன் மற்றும் பின் கதவுகளை உடைத்து உள்ளே நுழைந்த சிலர் குறித்த நபர் மீது கூரிய ஆயுதங்களால் தாக்கியுள்ளதாக பொலிஸார் தெரிவித்துள்ளனர். தாக்குதலுக்கு இலக்காகி பலத்த காயமடைந்த நபர்  களுத்துறை, நாகொடை வைத்தியசாலைக்கு கொண்டு செல்லப்பட்ட போது உயிரிழந்துள்ளார்.

தொடங்கொடை, டொலேலந்த பிரதேசத்தில் வசித்து வந்த மாத்தறை, ஆராச்கே பகுதியைச் சேர்ந்த 37 வயதுடைய ஒரு பிள்ளையின் தந்தையே இவ்வாறு உயிரிழந்துள்ளதாக பொலிஸார் தெரிவித்தனர்.

சந்தேகநபர்கள் அடையாளம் காணப்பட்டுள்ளதாகவும் அவர்கள் தற்போது பிரதேசத்தை விட்டு தப்பிச் சென்றுள்ளதாகவும் தெரிவிக்கப்படுகின்றது.

உயிரிழந்தவருக்கும், சந்தேகநபர்களுக்கும் மத்துகம பிரதேசத்தில் உள்ள பிரபல போதைப்பொருள் வியாபாரி ஒருவருடன்  தொடர்பு இருக்கலாம் எனவும், அவர்களுக்கு இடையில் ஏற்பட்ட தகராறு காரணமாக இந்த தாக்குதல் இடம்பெற்று இருக்கலாம் எனவும் பொலிஸார் தெரிவித்தனர். 

சந்தேக நபர்கள் இதுவரை கைது செய்யப்படாத நிலையில் தொடங்கொடை பொலிஸார் மேலதிக விசாரணைகளை முன்னெடுத்துள்ளனர்.