தவறவிடாதீர்கள்..!உடனே பதிவு செய்யுங்கள்

மிக மோசமான இனவாதத்தையும் தமிழர்களுக்கு எதிரான கருத்துக்களையும் நாடாளுமன்றிலும் பொதுவெளியிலும் பரப்பிவரும் முன்னாள் கடற்படை வீரர் சரத் வீரசேகர எம்.பியின் பின்னணியில் மகிந்த அணியினர் இருக்கலாம் என்ற சந்தேகம் தற்போது எழுந்துள்ளது. மகிந்த அணியினரின் பொதுஜன பெரமுன எம்.பிக்களின் உதவியுடனேயே பிரதமராக இருந்த ரணில் விக்ரமசிங்க நாடாளுமன்றத்தின் மூலம் ஜனாதிபதியாக தெரிவானார். எனினும் தற்போது ரணில் விக்ரமசிங்க நாட்டின் பொருளாதார ஸ்திரத்தன்மையை மாத்திரம் கருத்திற்கொண்டு செயற்படுவதால் மகிந்த அணியினரின் ஏனைய சலுகைகள் மற்றும் அமைச்சுப்பதவிகள் குறித்து கரிசனை காட்டாமல் இருக்கும் அதேவேளை, மொட்டு கட்சியினர் சிலரை தன் பக்கம் இழுத்துப்போடும் முயற்சியிலும் இறங்கியுள்ளார். இதை ஊகித்துள்ள மகிந்த அணியினர் தமது விசுவாசியான சரத் வீரசேகரவை கொண்டு சிங்கள மக்களின் மனதில் ரணிலின் ஆட்சி பற்றிய எதிர்மறை கருத்துக்களை பரப்பி வருகின்றனரா என்ற சந்தேகம் எழுந்துள்ளது. ஏனெனில், சரத் வீரசேகரவின் கருத்துகள் குறித்து இதுவரை மகிந்த அணியினர் எந்த பிரதிபலிப்பையும் வெளிப்படுத்தவில்லை என்பது முக்கிய விடயம்.