தவறவிடாதீர்கள்..!உடனே பதிவு செய்யுங்கள்

(என்.வீ.ஏ.)

இந்தியாவுக்கு எதிராக லண்டன், கெனிங்டன் ஓவல் விளையாட்டரங்கில் புதன்கிழமை (07) ஆரம்பமான ஐசிசி உலக டெஸ்ட் சம்பியன்ஷிப் இறுதிப் போட்டியில் ட்ரவிஸ் ஹெட், ஸ்டீவ் ஆகியோரின் பிரிக்கப்படாத இரட்டைச் சத இணைப்பாட்ட உதவியுடன் அவுஸ்திரேலியா பலம் வாய்ந்த நிலையில் இருக்கிறது.

ஹெட் ஆக்ரோஷமாகத் துடுப்பெடுத்தாடி சதம் குவித்ததுடன் ஸ்மித் நிதானத்துடன் துடுப்பெடுத்தாடி சதத்தை அண்மித்துக்கொண்டிருக்கிறார்.

அப் போட்டியில் முதலில் துடுப்பெடுத்தாட அழைக்கப்பட்ட அவுஸ்திரேலியா முதலாம் நாள் ஆட்ட நேர முடிவில் அதன் முதல் இன்னிங்ஸில் 3 விக்கெட்களை இழந்து 327 ஓட்டங்களைக் குவித்திருந்தது.

ஸ்டீவ் ஸ்மித், ட்ரவிஸ் ஹெட் ஆகிய இருவரும் பிரிக்கப்படாத 4ஆவது விக்கெட்டில் 251 ஓட்டங்களைப் பகிர்ந்து அவுஸ்திரேலியாவை பலம்வாய்ந்த நிலையில் இட்டனர்.

ஆரம்ப வீரர் உஸ்மான் கவாஜா ஓட்டம் பெறாமல் ஆட்டம் இழந்தபோதிலும் டேவிட் வோர்னரும் மார்னுஸ் லபுஸ்சானும் 2ஆவது விக்கெட்டில் 69 ஓட்டங்களைப் பகிர்ந்து அவுஸ்திரேலியாவுக்கு சிறு தெம்பைக் கொடுத்தனர்.

அவர்கள் இருவரும் 5 ஓட்டங்கள் வித்தியாசத்தில் ஆட்டம் இழந்தனர். (76 - 3 விக்.)

வோர்னர் 43 ஓட்டங்களுடனும் லபுஸ்சான் 26 ஓட்டங்களுடனும் ஆட்டம்; இழந்தனர்.

பகல் போசன இடைவேளைக்குப் பின்னர் 2ஆவது ஓவரில் லபுஸ்சான் ஆட்டம் இழந்ததும் ஜோடி சேர்ந்த ஸ்டீவ் ஸ்மித், ட்ரவிஸ் ஹெட் ஆகிய இருவரும் எவ்வித சிரமுமின்றி துடுப்பெடுத்தாடி ஓட்டங்களை சரமாரியாக பெற்றவண்ணம் இருந்தனர்.

ஸ்டீவ் ஸ்மித்தைவிட  ஆக்ரோஷமாகத் துடுப்பெடுத்தாடிய ட்ரவிஸ் ஹெட் 156 பந்துகளை எதிர்கொண்டு 22 பவுண்டறிகள், ஒரு சிக்ஸ் உட்பட 146 ஓட்டங்களுடன் ஆட்டம் இழக்காதிருந்தார்.

மறு பக்கத்தில் மிகவும் நிதானத்துடன் துடுப்பெடுத்தாடிய முன்னாள் அணித் தலைவர் ஸ்டீவன் ஸ்மித் 227 பந்துகளை எதிர்கொண்டு 14 பவண்டறிகள் அடங்கலாக 95 ஓட்டங்களுடன் ஆட்டம் இழக்காதிருந்தார்.

இந்தப் போட்டியில் 4 வேகப்பந்து வீச்சாளர்களுடன் விளையாடத் தீர்மானித்த இந்தியா முதலாவது ஆட்ட நேரப் பகுதியில் 2 விக்கெட்களையும் பகல் போசன இடைவேளைக்கு சற்று பின்னர் ஒரு விக்கெட்டையும் வீழ்த்தி ஆட்டத்தின் பிடியைத் தன்பக்கம் வைத்திருக்க முயற்சித்தது.

எனினும் அதன் பின்னர் இந்திய பந்துவீச்சாளர்களால் விக்கெட்களை வீழ்த்த முடியாமல் போனது.

சுழல்பந்துவீச்சாளர் ரவிச்சந்திரன் அஷ்வினை அணியில் சேர்க்காமல் விட்டது குறித்து இந்தியா வருத்தப்பட்டிருக்கும் என்பதில் சந்தேகம் இல்லை.

மொஹமத் சிராஜ் 67 ஓட்டங்களுக்கு ஒரு விக்கெட்டையும் ஷர்துல் தாகூர் 75 ஓட்டங்களுக்கு ஒரு விக்கெட்டையும் மொஹமத் ஷமி 77 ஓட்டங்களுக்கு ஒரு விக்கெட்டையும் கைப்பற்றினர்.

இரண்டு அணிகளும் ஐசிசி உலகக் கிண்ணம் (50 ஓவர்), ஐசிசி சம்பியன்ஸ் கிண்ணம், ஐசிசி இருபது 20 உலகக் கிண்ணம் ஆகிய மூன்றிலும் சம்பியனான நிலையில் ஐசிசி டெஸ்ட் சம்பியன்ஷிப்பில் வெற்றிபெறும் அணி 4 ஐசிசி கிண்ணங்களையும் சுமந்த முதலாவது அணி என்ற பெருமையைப் பெறும்.

இது இவ்வாறிருக்க, ஒடிஷாவில் இடம்பெற்ற கோர ரயில் விபத்தில் பலியான 250க்கும் மேற்பட்ட மக்களுக்கு அஞ்சலி செலுத்தும் வகையில் இப் போட்டியின்போது இரண்டு அணி வீரர்களும் கறுப்பு கைப்பட்டி அணிந்து விளையாடியதுடன் மத்தியஸ்தர்களும் கறுப்புப் பட்டி அணிந்திருந்தனர்.